Brýusselde Türkmenistan — Ýewropa Bileleşigi Bilelikdäki komitetiniň 23-nji mejlisi geçirildi. Türkmenistanyň wekiliýetine maliýe we ykdysadyýet ministri S.Joraýew ýolbaşçylyk etdi. Wekiliýetiň düzümine Türkmenistanyň ministrlikleriň we pudak edaralarynyň, şol sanda Daşky gurşawy goramak, Bilim, Daşary işler, Maliýe we ykdysadyýet ministrlikleriniň, şeýle hem Türkmenistanyň Ministrler Kabinetiniň ýanyndaky Ulag we kommunikasiýalar agentliginiň wekilleri girdi. Bu barada Türkmenistanyň DIM-niň resmi saýtynda habar berildi.

Habarda bellenilişi ýaly, mejlisde ÝB-niň wekiliýetine Ýewropanyň daşary aragatnaşyklar gullugynyň Ýewropa we Merkezi Aziýa meseleleri boýunça dolandyryjy direktoryň orunbasary Luk Dewin ýolbaşçylyk etdi. Wekiliýetiň düzümine ÝB-niň dürli bölümleriniň wekilleri, şol sanda söwda, halkara hyzmatdaşlygy, ulag, energetika, bilim we medeniýet, şeýle hem ylmy barlaglar we innowasiýalar boýunça Baş müdirlikleri girdi.

Mejlisde söwda ulgamyndaky özara gatnaşyklara, şol sanda Türkmenistanyň BSG-a goşulmagyny goldamak, Türkmenistanda we ÝB-de makroykdysady ýagdaý, ulag arabaglanyşygy we sanlylaşdyrma ýaly meselelere garaldy.

Energetika, daşky gurşawy goramak we durnukly ösüş ugurlaryna aýratyn üns berildi. Suw serişdelerini dolandyrmak, metan zyňyndylaryny azaltmak, sebitdäki ekologiýa meseleleri, şeýle-de gaýtadan dikeldilýän energiýa çeşmelerini ulanmak mümkinçilikleri ara alyp maslahatlaşmalaryň esasy meseleleri boldy. Türkmen tarapy bu ugurdaky geljekki ädimlere bolan garaýşyny beýan etdi.

Mundan başga-da, mejlise gatnaşyjylar ynsanperwer meseleler, bilim we medeni alyş-çalyş ugurlaryndaky hyzmatdaşlygy ara alyp maslahatlaşdylar. Türkmenistanyň wekiliýeti halkara akademiki özara gatnaşyklary babatyndaky başlangyçlaryny beýan etdi.

Öz gezeginde, ÝB Guramanyň dürli maksatnamalarynyň we taslamalarynyň çäklerinde hödürlenilýän mümkinçilikler bilen tanyşdyrdy. Bilim başlangyçlaryna, şeýle hem BOMCA we CADAP ýaly pudagara maksatnamalaryna aýratyn üns berildi.

ÝB-niň wekiliýeti Ýewropa Bileleşiginiň ykdysady görkezijileri we ykdysady ösüşiň geljegi barada çykyşy görkezdi. Häzirki ykdysady ösüş, senagatyň sanlylaşdyrylmagy we ählumumy faktorlaryň ýewropa bazarlaryna edýän täsiri barada möhüm maglumatlar berildi.

Mejlis Türkmenistan bilen Ýewropa Bileleşiginiň arasyndaky hyzmatdaşlygy berkitmegiň geljegi dogrusynda pikir alyşmak bilen tamamlandy.