Girmek
Türkiýäniň öňdebaryjy awiakompaniýasy «Turkish Airlines» «Halkara ulag-üstaşyr geçelgeleri: özara arabaglanyşyk we ösüş — 2024» atly halkara sergisine (ITTC 2024) gatnaşýar. Bu çäre kompaniýanyň soňky gazanan üstünliklerini hem-de howa gatnawlarynda durnukly ösüşiň üpjün edilýändigini görkezmek üçin ajaýyp meýdança boldy.
Häzirki wagtda «Turkish Airlines» örän uly ulag parkyna eýe bolup, ol ýerde 400-den gowrak ýolagçy we 24 sany ýük uçary bar. Gatnaw ugurlarynyň geografiki ulgamy 133 ýurdy öz içine alyp, awiakompaniýany hakykatdanam global derejedäki gatnadyja öwürýär.
Türkmenistan bilen Türkiýäniň arasyndaky hyzmatdaşlygyň ösüşiniň howa gatnawlarynyň geriminiň giňeldilmeginde aýdyň şöhlelenýändigini bellemelidiris. «Turkish Airlines» Aşgabat — Stambul — Aşgabat ugry boýunça hepdede 11 gatnawy amala aşyrýar we bu iki ýurduň arasyndaky ykdysady hem medeni gatnaşyklary pugtalandyrmaga ýardam edýär.
«ITTC 2024» sergisinde «Turkish Airlines-yň» wekilleri kompaniýanyň soňky täzeçillikleri, ýörite teklipler we hyzmatdaşlygyň mümkinçilikleri barada gürrüň berýärler. Ýolagçylar we hyzmatdaşlar bu ýerde gatnawlar ulgamy, nyrhlar, loýallyk programmalary hem-de awiakompaniýanyň beýleki hyzmatlary barada has giňişleýin maglumat alyp bilerler.