8 – 17-nji noýabr günlerinde Aşgabat şäherindäki Olimpiýa şäherçesiniň Tennis toplumynda 14 ýaşa çenli ýetginjek oglan-gyzlaryň arasynda Tennis boýunça «Ashgabat Open 2024» atly halkara ýaryş geçiriler. Oňa Türkmenistanyň, Türkiýäniň, Hindistanyň, Özbegistanyň, Täjigistanyň, Gazagystanyň, Pakistanyň, Eýranyň, Iordaniýanyň, Beýik Britaniýanyň, Malaýziýanyň wе Gonkong (HHR-iň), jemi 12 ýurduň we sebitden türgeniniň, şeýle hem sport wekiliýetleriniň gatnaşmagyna garaşylýar. "Watan" habarlar gepleşiginde habar berlişi ýaly, şu gün, 1-nji noýabrda sanly ulgam arkaly geçirilen Hökümet mejlisinde wise-premýer B.Orazdurdyýewa bu halkara sport ýaryşyna görülýän taýýarlyk barada döwlet Baştutanyna hasabat berdi.

Hasabatda bellenilişi ýaly, Türkmenistanyň Bedenterbiýe we sport baradaky döwlet komitetinde ýurduň degişli ministrlikleriniň we pudaklaýyn dolandyryş edaralarynyň wekillerinden ybarat bolan iş topary döredildi we onuň ýerine ýetirmeli çäreleriniň meýilnamasy tassyklanyldy. Häzirki wagtda ýurtda geçirilen iri halkara sport ýaryşlarynda toplanan tejribelerden ugur alyp, agzalan ýaryşy ýokary derejede guramaçylykly geçirmek bilen bagly taýýarlyk işleri alnyp barylýar.

Tennis boýunça «Ashgabat Open 2024» atly halkara ýaryşda baýrakly orunlara mynasyp bolan türgenlere ýadygärlik sowgatlarynyň, Halkara Tennis federasiýasynyň medallarynyň we sertifikatlarynyň gowşurylmagy göz öňünde tutulýar.

Prezident Serdar Berdimuhamedow hasabaty diňläp, Türkmenistanda sporty ösdürmek, ýurduň halkara sport abraýyny artdyrmak üçin netijeli işleriň alnyp barylýandygyny, dürli derejedäki sport ýaryşlaryny geçirmek üçin ähli şertleriň döredilýändigini kanagatlanma bilen belledi.

Döwlet Baştutany wise-premýere şu ýylyň noýabr aýynda Aşgabat şäherindäki Olimpiýa şäherçesiniň Tennis toplumynda 14 ýaşa çenli ýetginjek oglan-gyzlaryň arasynda tennis boýunça halkara ýaryşy geçirmäge gowy taýýarlyk görmegi tabşyrdy.