«Türkmenragatnaşyk» agentligi we Türkmenistanyň Söwda-senagat edarasy dünýäniň ylmy-tehniki ösüşi we döwür bilen aýakdaş gadam urýan alymlaryň özboluşly işläp taýýarlamalary bilen gyzyklanýanlary «Türkmentel-2024» atly halkara sergisi we ylmy maslahatyna gatnaşmaga çagyrýar.

14-16-njy noýabr aralynda geçiriljek halkara forum tehnologik taýdan ösen döwletleriň tejribesi, Aragatnaşyk pudagynda gazanylan üstünlikler, şeýle hem «akylly ulgamlardan», täze hemra we robot tehnologiýalaryna çenli telekommunikasiýa pudagynyň soňky gazananlary bilen tanyşmaga mümkinçilik döreder.

Foruma dünýäniň öňdebaryjy maglumat we telekommunikasiýa kompaniýalarynyň, halkara guramalarynyň, tehnologiýa merkezleriniň ýolbaşçylarydyr, wekilleriniň hem-de alymlardyr, bilermenleriň gatnaşmagyna garaşylýar.

Şeýle hem maslahata türkmen tarapyndan Hökümet agzalary,Mejlisiň, ministrlikleriň we pudaklaýyn dolandyryş edaralarynyň, ýurdumyzda işleýän diplomatik wekilhanalaryň, halkara guramalaryň ýolbaşçylarydyr wekilleri, jemgyýetçilik guramalarynyň, ýokary okuw mekdepleriniň, köpçülikleýin habar beriş serişdeleriniň wekilleri we hormatly ýaşulular gatnaşalar.

Özara bähbitli hyzmatdaşlygyň täze ugurlaryny kesgitlemek hem-de bilelikdäki taslamalary durmuşa geçirmek üçin açyk halkara meýdançasy hökmünde «Türkmentel-2024» halkara sergisi we ylmy maslahatynyň çäklerinde köptaraplaýyn gepleşikleri we duşuşyklary geçirmek meýilleşdirilýär.

Şeýle hem, forumyň dowamynda türkmen ýaşlarynyň arasynda geçirilen «Sanly çözgüt – 2024» atly innowasion taslamalaryň bäsleşiginiň ýeňijileri yglan edilip, olara gymmat bahaly sowgatlar hem-de hormat hatlary gowşurylar.