Girmek
Türkmenistanyň Russiýa Federasiýasyndaky ilçisi Esen Aýdogdyýew Garaşsyz Döwletleriň Arkalaşygynyň Ulag meseleleri boýunça hökümetara utgaşdyryjy geňeşiniň başlygy Gennadi Bessonow bilen duşuşdy.
Türkmenistanyň Moskwadaky diplomatik wekilhanasynyň habar bermegine görä, duşuşygyň dowamynda GDA-nyň çäginde ulag we logistika ugurlaryndaky hyzmatdaşlyk meselelerine garaldy.
Hususan-da, «Ulag hepdeligi — 2024-iň» çäklerinde noýabr aýynda Moskwada geçirilmegi meýilleşdirilýän Garaşsyz Döwletleriň Arkalaşygynyň Ulag meseleleri boýunça hökümetara utgaşdyryjy geňeşiniň 44-nji mejlisine görülýän taýýarlyk meseleleri ara alnyp maslahatlaşyldy.
Taraplar Demirgazyk — Günorta halkara ulag geçelgesiniň Gündogar şahasynyň, Türkmenbaşynyň halkara deňiz portunyň mümkinçiliklerini ýokarlandyrmak hem-de Astrahan sebitindäki aýratyn ykdysady zolagynda Türkmenistanyň logistika merkezini döretmek, şeýle-de pudaga sanly tehnologiýalary ornaşdyrmak bilen bagly meýilnamalar boýunça pikir alyşdylar.