15-16 iýulda Daşkentde «Türkmenistanda öndürilen» atly giň möçberli türkmen harytlarynyň milli sergisi geçirilýär. Bu çäre Bilelikdäki türkmen-özbek komissiýasynyň we Türkmen-özbek iş maslahatynyň mejlisleriniň çäklerinde guralandyr.

Sergide ykdysadyýetiň dürli pudaklaryndan 60-dan gowrak türkmen kompaniýasy öz önümlerini, Türkmenistanda öndürilýän harytlaryň we hyzmatlaryň giň toplumyny görkezýär. Bu barada Türkmenistanyň Senagatçylar we telekeçiler birleşigi «Türkmenportala» habar berdi.

Agrosenagatçylyk toplumy «Hasar», «Bars», «Täze aý», «Balam», «Ýunus» ýaly konditer önümleri süýt önümlerini we şokolady öndürýän kompaniýalar tarapyndan görkeziler. Gatnaşyjylar «Ýüpekçi», «Sada suw» we «Ýakymly kümüş suwy» kompaniýalarynyň alkogolsyz içgileriniň hilini baha berip bilerler.

Azyk senagaty hem giňden görkezilýär: «Owadan ülke» maýonez we ketçup toplumyny, «Gündogar akymy» bolsa günebakar ýagyny görkezýär. Sebitde ekzotiki hasaplanýan önümleri öndürmäge ýöriteleşen kompaniýalaryň stendleri aýratyn üns çeker. Mysal üçin, telekeçi Maýsa Welmuradowanyň eýeçiligine degişli düýeguş we Zereý Ibragimowyň önümçiligindäki hindi towuk eti göreziler.

Türkmenistanyň senagat pudagy dürli kompaniýalar tarapyndan görkezilýär. «Aýdyň gijeler» öý tehnikasyny, «Deregli ussat» aýna we gapylary öz içine alýan gurluşyk materiallaryny, «Nurseýit» gips önümlerini, «Ak bulut» bolsa gury gurluşyk garyndylaryny we gipsokartony görkezýär.

Ýeňil senagat «Muhammet Balkan» we «Röwşen» aýakgap öndürijileri, hem-de pagta ýüplügini we jorap öndürýän «Batly Gadam» tekstil kompaniýasy tarapyndan görkezilýär.

El bilen dokalýan adaty türkmen halylaryny görkezjek birnäçe hususy telekeçileriň, şol sanda Orazgül Eýeberdiýewa we Kümüş Tajibaýewanyň stendleri aýratyn gyzyklanma döredýär.

Himiýa senagaty ýuwujy serişdeleri öndürýän «Täç hil» we awtoulag ýaglaryna ýöriteleşen «Asuda akym» kompaniýalary tarapyndan görkezilýär. Sergide şeýle hem «Oguzabat» we «Aşgabatsyýahat» ýaly syýahatçylyk pudagynda işleýän kompaniýalar Türkmenistanyň syýahatçylyk mümkinçilikleri barada gürrüň bererler.

Guramaçylar «Türkmenistanda öndürilen» sergisiniň Türkmenistan we Özbegistan telekeçileriniň arasynda täze iş aragatnaşyklaryny ýola goýmak üçin möhüm meýdança boljakdygyna umyt edýärler. Çäre diňe bir türkmen önümleriniň giň toplumyny görkezmek bilen çäklenmän, eýsem ýurduň ösýän senagat we eksport mümkinçiliklerini hem nygtaýar. Serginiň köp sanly gatnaşyjylary, şol sanda özbek işewürler wekillerini, potensial maýadarlary we ýokary hilli türkmen harytlaryna gyzyklanma bildirýän adaty sarp edijileri özüne çekmegine garaşylýar.