Aşgabatda dabaraly ýagdaýda «Dokmaçylar» medeni merkezi açyldy, Serdar Berdimuhamedow BAE-niň kompaniýalaryny Türkmenistandaky iri energetika taslamalaryna gatnaşmaga çagyrdy, Gazagystan Respublikasynda Türkmenistanyň Medeniýet günleriniň açylyşy boldy we beýleki habarlar

Türkmenistanda

1. Aşgabatda Türkmenistanyň Dokma senagaty ministrliginiň «Dokmaçylar» medeni merkeziniň açylyş dabarasy boldy. Şanly waka mynasybetli binanyň öňündäki meýdança köp sanly türkmenistanlylar we paýtagtyň myhmanlary ýygnandylar. «Dokmaçylar» folklor-etnografiýa topary milli tanslary ýerine ýetirdi. Dabara sanly ulgam arkaly türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow goşuldy.

2. Prezident Serdar Berdimuhamedow «Türkmenistan — Birleşen Arap Emirlikleri» işewürler maslahatyna gatnaşmak üçin Aşgabada gelen BAE-niň ykdysadyýet ministri Abdulla bin Tuk Al-Marrini kabul etdi. Mundan beýläkki hyzmatdaşlygyň mümkinçiliklerini ara alyp maslahatlaşmagyň dowamynda taraplar BMG-niň çäklerinde syýasy dialogyň we özara gatnaşyklaryň ösüşi, ikitaraplaýyn söwda dolanyşygynyň ösüşi, ýangyç-energetika toplumynda hyzmatdaşlyk, gaýtadan dikeldilýän energetika pudagynyň mümkinçilikleri we halkara ulag geçelgelerini ösdürmek barada pikir alyşdylar. Prezident Serdar Berdimuhamedow Emirlikleriň kompaniýalaryny Türkmenistanda amala aşyrylýan iri halkara energetika taslamalaryna gatnaşmaga çagyrdy.

3. Türkmen halkynyň Milli Lideri Gurbanguly Berdimuhamedowyň Aşgabada iş sapary bilen gelen BAE-niň ykdysadyýet ministri Abdulla bin Tuk Al-Marri bilen duşuşygy boldy. Taraplar özara hormat goýmaga we goldamaga esaslanýan döwletara gatnaşyklarynyň ýokary derejesini bellediler. Energetika pudagynda hyzmatdaşlyga aýratyn üns berildi. Halk Maslahatynyň Başlygy TOPH gaz geçiriji taslamasynyň ähmiýetine ünsi çekdi we Emirlikleriň kärhanalaryny Türkmenistandaky halkara taslamalaryna gatnaşmaga çagyrdy.

4. Gazagystanda Türkmenistanyň Medeniýet günleriniň açylyş dabarasy boldy. Dabaranyň çäklerinde Türkmenistanyň sungat ussatlarynyň konserti geçirildi. Gazagystanly tomaşaçylara türkmen şahyry Magtymguly Pyraga bagyşlanan çeper film görkezildi. Şol bir wagtyň özünde Türkmenistanyň amaly-haşam we muzeý gymmatlyklarynyň sergisi açyldy. Medeniýet günleri 27-nji iýunda gala konsert bilen tamamlanar.

5. Prezident Serdar Berdimuhamedow Pakistanyň senagat we önümçilik boýunça federal ministri Rana Tanwir Hussaini kabul etdi. Taraplar syýasy dialogyň netijeli häsiýetini we halkara guramalarynyň çäklerinde hyzmatdaşlygyň ösýändigini bellediler. Senagat, energetika we ulag pudaklarynda hyzmatdaşlygyň mümkinçilikleri ara alnyp maslahatlaşyldy.

6. Türkmenistanyň Halk Maslahatynyň Başlygy Gurbanguly Berdimuhamedow Pakistan Yslam Respublikasynyň senagat we önümçilik boýunça federal ministri Rana Tanwir Hussain bilen duşuşdy. Taraplar döwletara gatnaşyklaryny ösdürmegiň mümkinçiliklerini ara alyp maslahatlaşdylar. Türkmen halkynyň Milli Lideri Gurbanguly Berdimuhamedow halklaryň taryhy-medeni umumylygyna esaslanýan döwletara gatnaşyklaryň netijeli häsiýete eýedigini belledi. Şeýle hem Pakistanyň ministriniň şu gezekki saparynyň ikitaraplaýyn gatnaşyklary pugtalandyrmaga ýardam berjekdigine ynam bildirdi.

7. «Turkmenportal» BMGÖM bilen bilelikde Türkmenistanda «Ýeňme» guramasynyň işgärleri we meýletinçileri üçin inklýuziw aragatnaşyk boýunça okuw geçirdi. Bu okuw oňa gatnaşyjylara häzirki zaman aragatnaşyk tejribelerini ulanmak arkaly «Ýeňme» guramasynyň işinde inklýuziwligi we dürlüligi ýokarlandyrmak endiklerini öwretmäge gönükdirildi. Bu maksatnama sosial ulgamlary ulanmak strategiýalaryny öwrenmegi, gender meselelerine bagyşlanan mazmun döretmegi we maýyplar bilen baglanyşykly temalary şöhlelendirmegi öz içine aldy.

Dünýäde

8. Astronomlar iri asteroidiň Ýere ýakynlaşýandygyny habar berdiler. Onuň 27-nji iýunda planetamyzdan 6,6 million km uzaklykdan geçmegine garaşylýar. Bu kosmiki jisim soňky 125 ýylda Ýere ýakynlaşýan iň uly jisimleriň biri hasaplanýar. Asteroidiň ululygy täsir galdyrýar: ini 1,7-den 3,9 km aralygy, bu bolsa Ýeriň golaýyndaky asteroidleriň 99%-inden has uludyr. Onuň tizligi sagatda takmynan 93 000 km. Uly göwrümine garamazdan, bu asteroid dinozawrlaryň ýok bolmagyna sebäp bolandyr öýdülýän kosmos gaýasyndan takmynan bäş esse kiçidir.

9. 2024-nji ýylda «Qatar Airways» geçen ýylky ýeňiji «Singapore Airlines-den» öňe geçip, planetanyň iň gowy awiakompaniýasy diýen adyny gaýdyp aldy. 1999-njy ýyldan bäri «Skytrax» britan kompaniýasy tarapyndan her ýyl düzülýän abraýly «World Airline Awards» sanawynyň netijeleri düýn Beýik Britaniýanyň paýtagtynda yglan edildi. «Skytrax-yň» sanawy ýolagçylaryň synlary esasynda düzülýär. Bu ýyl 100 ýurtdan 21 milliondan gowrak syýahatçy öz pikirini beýan etdi. Şeýle hem ilkinji onluga «Emirates», «Japan Airlines», «Turkish Airlines», «Air France» we beýlekiler girdi.

Sport habarlary

10. Şu gün Ýewro-2024-iň toparçalaýyn tapgyrynyň soňky oýunlary geçiriler. «E» toparçada Slowakiýa – Rumyniýa we Ukraina – Belgiýa duşuşarlar. Dört toparyň hemmesinde 3 utuk bar. «F» toparçada Gruziýa – Portugaliýa we Çehiýa – Türkiýe oýunlary bolar. Portugaliýa eýýäm pleý-offa çykmak hukugyny üpjün etdi. Türkiýäniň 3 utugy, Çehiýanyň we Gruziýanyň bir utugy bar. 1/8 finala toparçalarda birinji we ikinji orny eýelän toparlar, şeýle hem üçünji orny eýelän iň gowy dört ýygyndy çykar. Ýewropa çempionaty Germaniýada 14-nji iýundan 14-nji iýul aralygynda geçirilýär. Häzirki çempion Italiýanyň milli ýygyndysydyr.

11. Türkmenistanyň futbol boýunça ýaşlar ýygyndysy Merkezi Aziýa Futbol Assosiasiýasynyň çempionatyna gatnaşar. Ýaryş 5 – 12-nji iýul aralygynda Jelal-Abadda geçiriler. Bije çekişligiň netijelerine görä, Türkmenistanyň ýygyndysy «B» toparça düşdi we bu ýerde Eýranyň hem-de Özbegistanyň toparlary bilen oýnar. «A» toparçada Täjigistanyň, Gyrgyzystanyň we Owganystanyň ýaşlar ýygyndylary çykyş eder.