Şenbe gününden ýekşenbä geçilýän gijede Awstraliýanyň «Sentral Kost Marines» topary AFK-nyň kubogynyň iň soňky eýesi bolmagy başardy.

Final duşuşygynda topar Liwanyň «Al-Ahedini» 1:0 hasabynda ýeňdi. Duşuşykdaky ýeke-täk pökgini 84-nji minutda Alu Kuolýa geçirdi. Şeýlelikde, ozal halkara ýaryşlarda hiç hili baýragy bolmadyk Awstraliýanyň kluby ilkinji baýragynyň eýesi boldy.

Şunluk bilen «AFK-nyň kubogy» atly ýaryş taryha girýär. AFK indiki möwsümden başlap, AFK-nyň elita Çempionlar ligasyna, AFK-nyň Çempionlar ligasyna we Çagyryş ligasyna badalga berer.

AFK-nyň kubogynyň şu möwsüminde Türkmenistandan «Merw» we «Altyn asyr» toparlarynyň gatnaşandygyny ýatladýarys. Olar Gyrgyzystanyň «Abdyş-Ata» we Täjigistanyň «Rawşan» toparlary bilen bir toparçada ýaryşypdylar.

«E» toparçada birinji orny eýelän «Abdyş-Atanyň» ýaryşyň sebitara final bölegine çenli baryp ýetendigini ýatladýarys.