Girmek
Şu gün Aşgabatda Prezident Serdar Berdimuhamedowyň gatnaşmagynda Bütindünýä saglyk güni mynasybetli köpçülikleýin welosipedli ýöriş geçirildi. Bu barada "Watan" habarlar gepleşiginde habar berildi.
Bellenilişi ýaly, milli senenamada mynasyp orun alan bu senäniň her ýyl uly ruhubelentlik bilen giňden bellenilmegi türkmen halkynyň sagdyn we işjeň durmuş ýörelgelerine ygrarlylygynyň güwäsi bolup durýar.
Döwlet Baştutanynyň şeýle sport çärelerine gatnaşmagy bu wakanyň ähmiýetini hem-de halkyň durmuş derejesini ýokarlandyrmak bilen baglanyşykly ähli wezipeleriň üstünlikli çözülýändigini görkezýär.
Şeýle hem şu gün Bütindünýä saglyk güni mynasybetli welosipedli ýörişler Arkadag şäherinde we ýurduň ähli welaýatlarynda guraldy. Bu sene mynasybetli ýurtda "tegelek stol" maslahatlary, duşuşyklar, ylmy-amaly maslahatlar, sportuň dürli görnüşleri boýunça ýaryşlar we görkezme çykyşlary, wagyz-nesihat, bedenterbiýe-sagaldyş we medeni çäreler geçirildi. Bu çäreler bilim alýan ýaşlary, edara-kärhanalaryň işgärlerini, türgenleri bir ýere jemledi. Bu ajaýyp baýrama bagyşlanyp tele we radio gepleşikler taýýarlanyldy, köpçülikleýin habar beriş serişdelerinde makalalar çap edildi.