4-nji martda başlanjak Türkmenistanyň çempionatynyň täze möwsümine taýýarlanmak üçin BAE-niň Abu-Dabi şäherinde guralýan okuw-maslahatyna gatnaşýan türkmenistanly eminler 20-nji fewralda geçirilen halkara ýoldaşlyk duşuşyklarynyň üçüsinde eminlik etdiler. Bu barada Türkmenistanyň Futbol federasiýasy habar berýär.

Russiýanyň Premýer-ligasynyň öňdebaryjy toparlary bolan «Zenit» hem-de «Lokomotiw» klublarynyň arasyndaky ýoldaşlyk duşuşyga Resul Mämmedow eminlik etdi. Oňa Pälwan Pälwanow hem-de Babanazar Haknazarow kömekçilik etdiler. Oýun 1:1 hasabynda tamamlandy.

Moskwanyň «Spartagy» bilen Gyrgyz Respublikasynyň «Abdyş-Ata» toparlarynyň arasynda geçirilen duşuşykda Akmyrat Gurbanowyň ýolbaşçylygyndaky (kömekçi eminler Şageldi Hydyrow bilen Hursant Abdiýazow) eminler topary eminlik etdi. Bu duşuşykda 4:0 hasabynda «Spartak» topary ýeňiş gazandy.

BAE-niň «Gulf Ýunaýted» topary bilen «Lokomotiň» ýaşlar düzüminiň arasynda geçirilen duşuşykda Arslan Goşşanow eminlik etdi. Bu duşuşykda meýdandaky emine Ýusup Jumamyradow bilen Nariman Garajaýew kömekleşdiler. Oýun 11:1 hasabynda «Lokomotiwiň» ýaşlar düzüminiň peýdasyna tamamlandy.

Çeşmäniň bellemegine görä, 21-nji fewralda geçiriljek halkara ýoldaşlyk duşuşyklarynyň üçüsinde türkmenistaly eminler toparynyň eminlik etmegine garaşylýar.

Ýeri gelende bellesek FIFA derejeli türkmen eminleriniň 13-si hem-de halkara derejeli FIFA-nyň instruktorlarynyň 2-si BAE-niň Abu-Dabi şäherinde okuw-türgenleşik ýygnanyşygyny geçirýärler.

Türkmen eminleri üçin tejribe mekdebi boljak okuw-maslahatynyň dowamynda olar BAE-de okuw-türgenleşik ýygnanyşyklaryny geçirýän adybelli futbol toparlarynyň gatnaşmagyndaky ýoldaşlyk duşuşyklaryna eminlik etmäge mümkinçilik alýarlar.

Türkmenistanly eminler toparynyň gatnaşmagyndaky Abu-Dabi şäherinde geçirilýän okuw-maslahaty 24-nji fewrala çenli dowam eder.