Futzal boýunça Türkmenistanyň zenanlar ýygyndysy Täjigistanyň paýtagty Duşenbe şäherinde geçiriljek Merkezi Aziýanyň Futbol Assosiasiýasynyň — «CAFA Women’s Futsal Championship-2024» halkara ýaryşyna gatnaşar. 4-11-nji fewral aralygynda guraljak halkara ýaryşy milli ýygyndylaryň 5-siniň (Türkmenistan, Täjigistan, Eýran, Özbegistan, Gyrgyz Respublikasy) gatnaşmagynda geçiriler. Bu barada TFF-niň resmi saýty habar berýär.

Zenanlar ýygyndy toparymyz halkara ýaryşyna taýýarlygyň çäginde ýanwar aýynda 20 günüň dowamynda paýtagtymyzda okuw-türgenleşik ýygnanyşygyny geçirdi. Türgenleşik ýygnanyşygynyň ýygyndy toparymyzyň tälimçiler düzümi Ýakup Öwezowyň we Kamil Mingazowyň ýolbaşçylygynda geçirilendigini bellemek gerek.

Ýygyndy toparymyzyň tälimçiler düzümi halkara ýaryşyna gatnaşmak üçin futzalçylaryň 14-sini milli ýygyndymyzyň düzümine çagyrdylar.

Derwezeçiler: Aýşa Amanberdiýewa, Malika Eminowa.

Meýdançadaky oýunçylar: Jeren Mämmedowa, Kamila Mingazowa, Maýa Musaskaýa, Perwana Gurbanowa, Leýli Atajanowa, Swetlana Prýannikowa, Jemile Babaýewa, Malika Mämmedowa, Mariýa Çaryýewa, Ejegül Durdyýewa, Läle Haýypowa, Mariýa Hmyrowa.

Şeýle-de, MAFA-nyň ýaryşynda türkmenistanly halkara derejeli emin Merjen Bagşyýewa eminlik etmäge çakylyk aldy. TFF-niň Eminler bölüminiň başlygy Wadim Baratow bolsa halkara ýaryşynda eminleriň gözükdirijisiniň wezipesini ýerine ýetirer.

Zenanlar ýygyndymyzyň oýunlarynyň tertibi (Aşgabatda wagty bilen görkezilen)

1-nji tapgyr

4-nji fewral (ýekşenbe)

14:00 - TÜRKMENISTAN - Gyrgyzystan

2-nji tapgyr

5-nji fewral (düşenbe)

16:00 - TÜRKMENISTAN - Özbegistan

3-nji tapgyr

7-nji fewral (çarşenbe)

19:00 - Täjigistan –– TÜRKMENISTAN

4-nji tapgyr

9-njy fewral (anna)

16:00 - Eýran - TÜRKMENISTAN