Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň GFR-iň “Goetzpartners Emerging Markets GmbH” maslahat beriş kompaniýasynyň dolandyryjy direktory Wladimir Matias we bu kompaniýanyň uly geňeşçisi Hans Gerd Prödel bilen duşuşygy boldy. Bu barada "Watan" habarlar gepleşiginde habar berildi.

Bellenilişi ýaly, duşuşygyň dowamynda ikitaraplaýyn gatnaşyklary mundan beýläk-de ösdürmegiň meselelerine garaldy.

Köp ýyllaryň dowamynda Germaniýanyň iri kompaniýalary türkmen bazarynda üstünlikli işleýärler. Saglygy goraýyş ulgamynda köpýyllyk türkmen-german hyzmatdaşlygynyň ýola goýulmagy bellenilmäge mynasypdyr. Şunuň bilen baglylykda, özara tejribe alyşmak meselelerine möhüm üns berilýär. Ýurdumyzyň lukmançylyk edaralarynda nemes kompaniýalarynyň iň kämil, öňdebaryjy enjamlary giňden ornaşdyrylýar diýip, Türkmenistanyň Halk Maslahatynyň Başlygy sözüni dowam etdi.

Arkadag şäherinde dörediljek lukmançylyk klasteri halkara derejesine eýe bolup, onda dürli görnüşli lukmançylyk serişdeleriniň önümçiligi diňe bir Türkmenistan üçin däl, eýsem, eksporta niýetlenendigini bellemek ýakymly. Şunda Türkmenistanda bar bolan çig mal serişdeleriniň ulanylmagy önümiň ýokary hilli, ekologiýa taýdan arassa bolmagy bilen bir hatarda, ýurduň ykdysadyýetiniň kuwwatlanmagynda bolşy ýaly, türkmen-german gatnaşyklarynyň ösdürilmeginde möhüm orun eýelär.

Soňra bu ýerde Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen GFR-iň “Goetzpartners Emerging Markets GmbH” maslahat beriş kompaniýasynyň arasynda özara düşünişmek hakynda Ähtnama gol çekildi. Munuň özi özara peýdaly hyzmatdaşlygyň mundan beýläk-de ösdürilmeginiň kanunçylyk taýdan berkidilýändiginiň nobatdaky subutnamasy boldy.