ABŞ-nyň Türkmenistandaky Ilçihanasy 2024-2025-nji ýyllarda «Fulbright Teaching Excellence and Achievement» maksatnamasyna gatnaşmak üçin açyk bäsleşik geçirýär.

«Türkmenistan: Altyn asyr» elektron neşirinde habar berlişi ýaly, «Sapak bermek ussatlygyny kämilleşdirmek», ýagny «Fulbright» maksatnamasy mugallymlara hünär başarnygyny ýokarlandyrmaga, mugallymçylyk ukyplaryny artdyrmaga we ABŞ barada bilimlerini giňeltmäge özboluşly mümkinçilik döredýär.

Maksatnama gatnaşyjylar 2025-nji ýylyň ýanwarynda ýa-da sentýabrynda ABŞ-da başlanýan alty hepdelik okuwa giderler. Okuw maksatnamasynyň çäklerinde mugallymlara okatmagyň usullary, sapagyň meýilnamalaşdyrylyşy, şeýle hem maglumat tehnologiýasyny okatmagyň guraly hökmünde ulanmak boýunça umumy sapaklar we intensiw okuwlar berler.

Mugallymlar ABŞ-nyň özüni kabul edýän uniwersitetinde ýöriteleşdirilen maslahatlara gatnaşarlar, orta mekdeplerde sapak geçirerler, amerikan kärdeşleri bilen tejribe alyşmaga we ABŞ-nyň bilim ulgamy bilen içgin tanyşmaga mümkinçilik alarlar. Maksatnamanyň dowamynda oňa gatnaşyjylar üçin medeni çäreler hem guralar.

Maksatnama gatnaşmak üçin dalaşgärler ýokary bilimli, Türkmenistanyň raýaty bolmaly, iňlis dili, matematika, tebigy ylymlar, jemgyýetçilik bilimleri we beýleki ugurlardan azyndan 5 ýyl iş tejribesi bolan Türkmenistanyň orta mekdeplerinde ýa-da dil merkezlerinde işleýän bolmaly.

Oňa gatnaşmak üçin ýüztutmalar şu ýylyň 16-njy fewralyna çenli kabul edilýär. Maksatnama gatnaşmagyň düzgünleri, dalaşgärlere bildirilýän talaplar, ýüztutmalary resmileşdirmek, resminamalary tabşyrmak we şuňa meňzeş meseleler barada maglumatlar ABŞ-nyň Türkmenistandaky ilçihanasynyň saýtynda ýerleşdirilendir.