17-nji ýanwarda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň III möwsüminiň V saýlama oýny geçirildi. Bu barada institutyň metbugat gullugy «Turkmenportala» habar berdi.

«Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly umumy şygar astynda geçirilýän III möwsümiň III saýlama oýnunyň temasy «Gajar döwletiniň XVIII asyrdaky – XIX asyryň I çärýegindäki halkara gatnaşyklary we daşary syýasaty» diýip atlandyryldy.

«Parahatçylygyň ýaş çaparlary» atly akyl-paýhas bäsleşiginiň III möwsüminiň V saýlama oýnuna Aşgabat şäherinden 3 sany, Ahal welaýatyndan 1 sany, Balkan welaýatyndan 1 sany, Lebap welaýatyndan 1 sany we Mary welaýatyndan 2 sany mekdep okuwçysy gatnaşdy.

Çekeleşikli ýagdaýda geçen bäsleşigiň jemlerine görä, sowallara düsr jogap bermekde beýleki gatnaşyjylardan tapawutlanan Lebap welaýatynyň Kerki etrabynyň 35-nji orta mekdebiniň 11-nji synp okuwçysy Gülaýym Bakyýewa, Mary welaýatynyň Sakarçäge etrabynyň Şatlyk şäherindäki takyk we tebigy ugurlardan ýöriteleşdirilen 43-nji orta mekdebiniň 11-nji synp okuwçysy Seýitmuhammet Gurbangeldiýew dagy ýeňiji boldular. Şeýlelikde, olar «Parahatçylygyň ýaş çaparlary» atly akyl-paýhas bäsleşiginiň III möwsüminiň ýarym final oýnuna gatnaşmaga hukuk gazandylar.

Bäsleşigiň ýeňijilerine, şeýle-de oňa gatnaşyjylara hemaýatkärler tarapyndan taýýarlanan gymmatbahaly sowgatlar hem-de Türkmenistanyň Daşary işler ministrliginiň Halkara gatnaşyklary institutynyň Hormat hatlary gowşuryldy.