Şu gün — 8-nji ýanwarda Prezident Serdar Berdimuhamedow Türkiýe Respublikasynyň Türkmenistanda täze bellenen Adatdan daşary we Doly ygtyýarly ilçisi Ahmet Demiroky kabul etdi. Bu barada «Watan» habarlar gepleşiginde habar berildi.

Bellenilişi ýaly, diplomat mähirli kabul edilendigi üçin hoşallyk bildirip, Prezident Serdar Berdimuhamedowa hem-de türkmen halkynyň Milli Liderine Türkiýe Respublikasynyň Prezidentiniň mähirli salamyny ýetirdi we iň gowy arzuwlaryny beýan etdi.

Prezident Serdar Berdimuhamedow ilçini jogapkärli wezipä bellenmegi bilen gutlap, alyp barjak işlerinde oňa üstünlikleri arzuw etdi.

Duşuşygyň barşynda Prezident Serdar Berdimuhamedow we Türkiýe Respublikasynyň Türkmenistanda täze bellenen Adatdan daşary we Doly ygtyýarly ilçisi iki ýurduň arasynda ýola goýlan döwletara gatnaşyklaryň hemişe özara hormat goýmak, birek-birege goldaw bermek tejribesine eýerýändigini, halkara syýasatyň özara gyzyklanma bildirýän meseleleri boýunça, aýratyn-da, dünýäde parahatçylygy we howpsuzlygy üpjün etmek, Durnukly ösüş maksatlaryna ýetmek babatda garaýyşlaryň meňzeşdigini ýa-da gabat gelýändigini kanagatlanma bilen bellediler.

Duşuşykda Türkiýäniň Türkmenistanyň söwda-ykdysady gatnaşyklary alyp barýan iň möhüm hyzmatdaş ýurtlarynyň biridigi bellenildi. Söhbetdeşler bu ugurda gatnaşyklary has-da ösdürmek üçin uly mümkinçilikleriň bardygyna ünsi çekip, şunda Ykdysady hyzmatdaşlyk boýunça Hökümetara türkmen-türk toparyna we Işewürlik geňeşine uly ornuň degişlidigini bellediler.

Umumy pikire görä, iki ýurtda sergileriň, özara Medeniýet günleriniň we beýleki medeni çäreleriň yzygiderli geçirilmegi ähli ugurlar boýunça ýola goýlan netijeli hyzmatdaşlygy mundan beýläk-de ösdürmäge gönüden-göni täsir edýär.

Şeýle-de duşuşykda türkmen hünärmenleriniň we ýaşlarynyň Türkiýede bilim almagynyň hem-de tejribe okuwlaryna gatnaşmagynyň Türkmenistanyň bilim ulgamynyň kämilleşmegine ýardam edýändigi bellenildi.