Girmek
Türkmenistanda ýurduň ykdysadyýet, maliýe we bank toplumynyň 2024-nji ýyl üçin iş meýilnamalaryny taýýarlamak boýunça degişli işler ýerine ýetirildi. «Watan» habarlar gepleşiginde habar berlişi ýaly, bu barada şu gün — 6-njy ýanwarda sanly ulgam arkaly geçirilen Hökümet mejlisinde wise-premýer H.Geldimyradow döwlet Baştutanyna hasabat berdi.
Hasabatda bellenilişi ýaly, öňde goýlan wezipeleri nazara almak bilen, meýilnamalarda ýurduň durmuş-ykdysady taýdan okgunly ösmegini, milli ykdysadyýetiň döwrebaplaşdyrylmagyny üpjün etmek, döwrebap sanly tehnologiýalary mundan beýläk-de giňden ornaşdyrmak, Döwlet býujetini üstünlikli ýerine ýetirmek, maýa goýum syýasatyny kämilleşdirmek boýunça çäreler göz öňünde tutulýar.
Geçirilýän işlerde halkara maliýe guramalary bilen hyzmatdaşlyga, dünýäniň öňdebaryjy tejribesiniň ornaşdyrylmagyna we degişli kanunçylyk binýadynyň kämilleşdirilmegine aýratyn üns berler.
Prezident Serdar Berdimuhamedow hasabaty diňläp, ykdysadyýet, maliýe we bank toplumynyň işiniň hem ýurduň hemmetaraplaýyn ösüşi bilen aýrylmaz baglydygyny belledi we wise-premýer H.Geldimyradowa milli ykdysadyýet bilen bagly işleri yzygiderli kämilleşdirmäge möhüm ähmiýet bermegi tabşyrdy.