AFK-nyň Çempionar ligasy geljek möwsümden başlap, uly özgerişligi başdan geçirer. «Sport.tj» neşiriniň ýazmagyna görä, yklymyň iň iri klublaýyn futbol baýramçylygy täze möwsümden başlap, iki derejede geçiriler. Has takygy, şu möwsümde tamamlanansoň, AFK-nyň Elita Çempionlar ligasyna we AFK-nyň Çempionlar ligasy ― 2-ä janköýerlik ederis.

Täze düzgüne görä, yklymyň iň ýokary derejeli ýaryşy elita toparlaryň arasynda geçirilip, ol toparçalaýyn tapgyrdan başlar, soňra çärýek, ýarym final we final duşuşyklary geçiriler. Bu duşuşyklaryň ählisini bir döwletde geçirmek meýilleşdirilýär diýip, özbegistanly bilermen Alişer Nikimbaýew habar berýär.

AFK-nyň habar bermegine görä, ýaryş 2025-nji we 2026-njy ýyllarda Saud Arabystanynda geçiriler. Ýurduň özi bolsa bu ýaryşy bassyr bäş ýyl kabul etmäge taýýar.

Döwletleriň 2025/26-njy ýyllaryň möwsüminde ýaryşlara gatnaşmak mümkinçiligi şol wagtky reýtinge görä belli bolar.

Türkmenistan AFK-nyň klublaýyn reýtinginiň Günbatar sebitinde häzirki wagtda onunjy orny eýeleýär. Bu bolsa Türkmenistanyň bir toparynyň AFK-nyň Çempionlar ligasy ― 2-niň toparçalaýyn tapgyryna gatnaşmaga mümkinçiliginiň boljakdygyny görkezýär. Ýurduň ikinji wekili bolsa saýlama tapgyrdan gelmeli bolar.

Ýaryşlar şu tertipde geçiriler:

Elita Çempionlar ligasy:

• Toparçalarda ― 24 topar
• Olaryň 20-si gönüden göni toparça girip bilerler
• Plef-offa gatnaşan 6 toparyň dördüsi olara goşluşmaga hukuk alar.

Çempionlar ligasy ― 2:

• Toparçalaýyn tapgyra 32 topar gatnaşar
• Olaryň 20-si toparçalara gönüden-göni ýollanma alar
• Elita liganyň pleý-offundan geçip bilmedik iki topar goşular
• Ikinji liganyň pleý-off tapgyryna gatnaşan 12 toparyň 10-sy toparçalara goşluşmaga hukuk gazanar.

Çagyryş ligasy:

• Toparçalaýyn tapgyrda 20 topar
• 6-sy göni ýollanma gazanar
• Ikinji liganyň pleý-off tapgyryndan 2 topar geler.
• Çagyryş ligasynyň pleý-ofllaryna gatnaşan 20 toparyň 12-si toparçalaýyn tapgyra hukuk gazanar.