Girmek
Eýranly ýyldyz hüjümçi Serdar Azmun karýerasyny Ýewropanyň öňdebaryjy çempionatlarynyň ýene birinde – Italiýanyň çempionaty «Serie A»-da dowam etdirer.
28 ýaşyndaky hüjümçi paýtagt Rimiň «Roma» topary bilen 1 ýyllyk kärendesine şertnama baglaşdy. «Roma» topary möwsümiň ahyrynda Azmuny ymykly düzümine geçirmek islese, onda Germaniýanyň «Baýer» klubuna 12 million ýewro bermeli bolar. Azmun meşhur tälimçi Žoze Mourinionyň tälimçiligindäki klubda 17-nji belgili köýnekçede oýnar.
Tanymal hüjümçi «Baýerde» 1,5 möwsüm çykyş edip, 44 duşuşykda 5 gol geçirdi. Ondan öň 4 möwsüm «Zenitde» 104 duşuşykda 62 goly öz adyna ýazdyrdy. «Zenitden» öňem «Rubin» we «Rostow» toparlarynda çykyş eden Azmun bu klublaryň hersinde 77 duşuşyk geçirip, «Rubinde» 17, «Rostowda-da» 25 gezek tapawutlandy. Eýranyň ýygyndysynda 71 oýunda 45 gol geçiren Azmunyň täze çempionatda nähili başarnyk görkezjekdigi hemmeleri içgin gyzyklandyrýar.