Girmek
Zähmet rugsadynda bolýan Prezident Serdar Berdimuhamedow şu gün sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Onda Hökümet agzalarynyň şu ýylyň ýanwar – iýul aýlarynda ýerine ýetirilen işleriň jemleri baradaky hasabatlary diňlenildi hem-de ýurdy durmuş-ykdysady taýdan ösdürmegiň gaýragoýulmasyz wezipelerine garaldy. Bu barada «Watan» habarlar gepleşiginde habar berildi.
Mejlisde, ilki bilen, Türkmenistanyň Mejlisiniň Başlygy D.Gulmanowa söz berildi. Ol şu ýylyň 7 aýynda milli kanunçylygy kämilleşdirmek boýunça alnyp barlan işler barada maglumat berdi. Şeýle hem ýurduň mukaddes Garaşsyzlygynyň 32 ýyllyk baýramynyň bellenýän günlerinde Türkmenistanyň Halk Maslahatynyň mejlisini ýokary guramaçylyk derejesinde geçirmäge görülýän taýýarlyk barada aýdyldy.
Döwlet Baştutany Türkmenistanyň Halk Maslahatynyň mejlisine gowy taýýarlyk görmegiň möhümdigini belledi. Şeýle hem ýurduň kanunçylygyny kämilleşdirmek boýunça zerur işleri geçirmegiň wajypdygyny aýtdy.
Soňra mejlisiň barşynda wise-premýerler hem-de Ministrler Kabinetiniň ýanyndaky Ulag we kommunikasiýalar agentliginiň Baş direktory gözegçilik edýän düzümlerinde şu ýylyň 7 aýynda alnyp barlan işler we olaryň netijeleri, şeýle hem pudaklary mundan beýläk-de ösdürmek boýunça durmuşa geçirilýän çäreler, döwlet Baştutanynyň ozal beren tabşyryklarynyň ýerine ýetirilişi, öňde boljak çäreler, olara görülýän taýýarlyk işleri barada hasabatlary berdiler.
Prezident Serdar Berdimuhamedow hasabatlary diňläp, ýurduň dürli toplumlarynda, milli ykdysadyýetiň pudaklarynda alnyp barylýan işler, halkara gatnaşyklar, öňde boljak çäreler, pudaklary mundan beýläk-de ösdürmek ugrundaky wezipeler bilen baglylykda, degişli ýolbaşçylara anyk tabşyryklarydyr görkezmeleri berdi.
Sanly ulgam arkaly geçirilen mejlisiň barşynda Türkmenistanyň Prezidenti käbir resminamalara hem gol çekdi.
Hökümet mejlisinde başga-da birnäçe möhüm meselelere garaldy. Olar boýunça degişli çözgütleri kabul edip, döwlet Baştutany mejlisi jemledi.