Girmek
Türkmenistanly ýeňil atletikaçy Mergen Mämmedow 1-2-nji iýul günlerinde Gazagytsanyň Almaty şäherinde geçirilen halkara ýaryşda ýekedaban zyňmak boýunça altyn medala mynasyp boldy.
Bu ýaryş meşhur gazak türgeni Gusman Kosanowyň hatyrasyna her ýyl geçirilýär. Onuň «World Athletics Continental Tour» tapgyrynyň senenamasyna girizilýändigini we abraýy boýunça bürünç derejeli ýaryşlaryň biridigini aýtmak gerek. Bu ýaryş, şol bir wagtyň özünde Olimpiýa oýunlary ― 2024-iň saýlama tapgyrlarynyň biri bolup durýar.
Şeýle bolansoň, halkara ýaryşa Hytaýdan, Hindistandan, Tailanddan, Eýrandan, Täjigistandan, Özbegistandan, Gyrgyz Respublikasyndan, Türkmenistandan, Ermenistandan, Azerbaýjandan, Gruziýadan hem-de Gazagystandan ýüzlerçe türgen gatnaşdy.
Ýekedaban zyňmak boýunça ýaryşlara gatnaşan Mergen Mämmedowa taý tapylmady. Ol zyňan ýekedabany 70 metre çenli baryp ýetdi. Munuň özi ýaryşyň kümüş medalynyň eýesi gazagystanly türgen Wadim Puntusyň görkezen netijesinden 20 metr çemesi kändir. Üçünji orny bolsa 39,93 metrlik netije bilen gazagystanly türgen Ýewgeniý Labutow eýeledi.
Umuman, Almaty Mergen Mämmedowyň sport ýoly üçin düşümli şäherleriň biri. Ol 2013-nji ýylda hut şu şäherde 74,01 metrlik netije bilen Türkmenistanyň rekordyny hem goýupdy.