Şu gün agşam Prezident Serdar Berdimuhamedow Arkadag şäherine gelip, bu ýerde guralan baýramçylyk dabaralaryna gatnaşdy. Sebitde deňi-taýy bolmadyk «akylly» Arkadag şäheriniň gurluşygynyň birinji tapgyrynyň binalarynyň açylyp ulanmaga berilmegi mynasybetli, şäheriň Merkezi seýilgähinde Türkmenistanyň sungat ussatlarynyň baýramçylyk konserti boldy.

«Watan» habarlar gepleşiginde habar berlişi ýaly, sungat ussatlarynyň belent ruha beslenen çykyşlarynda türkmen halkynyň baý medeni mirasynyň, ýurduň häzirki döwürde gazanýan üstünlikleriniň, şeýle hem Berkarar döwletiň täze eýýamynyň Galkynyşy döwrüniň beýik döredijilik ruhy öz beýanyny tapdy.

Dabaranyň edebi maksatnamasyna aýdymlar we joşgunly tanslar, artistleriň, döredijilik toparlarynyň sungatyň dürli ugurlary boýunça ýerine ýetiren çykyşlary, milli sungatyň baý däpleri, özboluşly öwüşgini we ägirt uly mümkinçilikleri bolan döredijilik çykyşlary girizildi.

Konserte gatnaşyjy sungat ussatlary özleriniň belent owazlary bilen Arkadag şäheriniň, Prezident Serdar Berdimuhamedowyň parasatly baştutanlygynda ösüşleriň täze belentliklerine tarap ynamly gadam urýan Türkmenistanyň waspyny ýetirdiler.

Soňra köpöwüşginli feýerwerk hem-de dronlaryň şüweleňi baýramçylygyň jemleýji dabarasyna öwrüldi.

Dabara tamamlanandan soň, Prezident Serdar Berdimuhamedow oňa gatnaşyjylar bilen mähirli hoşlaşdy we bu ýerden ugrady.