Türkmenistanda

1. Türkmenistanyň zergärleriniň arasynda geçirilen bäsleşigiň jemleri boýunça ýeňijileri sylaglamak dabarasy geçirildi. Bu çäre Türkmenistanyň Jemgyýetçilik guramalarynyň merkezinde geçirildi, ýaryşa ussat hünärmenler we höwesjeňler gatnaşdylar. Bäsleşik üç tapgyrda geçirildi. Jemleýji tapgyrda bäsleşige gatnaşyjylar öz taýýarlan önümleriniň bäşisini tanyşdyrdylar we olaryň hersiniň ähmiýetini hem-de aýratynlygyny düşündirdiler. Ýeňijileriň ählisine bäsleşigi guraýjylar tarapyndan gymmat bahaly sowgatlar we Hormat hatlary gowşuryldy.

2. Internet-banking Türkmenistanyň ýaşaýjylarynyň arasynda barha meşhurlyk gazanýar. Ulanyjylaryň sany ýylsaýyn güýçli depginde artýar. 2023-nji ýylyň iýun aýyna çenli internet-banking hyzmatyny işjeň ulanyjylaryň sany 980 müňden geçdi. Bu görkeziji boýunça bazaryň öňdebaryjysy – «Daýhanbank», ikinji orunda – «Türkmenistan» banky, üçünji orunda – «Türkmenbaşy» banky.

3. Golaýda Türkmenistanyň Döwlet medeni merkeziniň Döwlet muzeýiniň seýrek duş gelýän eksponatynyň – Köneürgenç meteoritiniň 25 ýaşy dolýar. Asman jisimi Türkmenistanyň çägine 1998-nji ýylyň 20-nji iýunynda Köneürgenç şäheriniň 7 km günortasyna ýerli wagt bilen 17:30-da düşdi. Köneürgenç meteoriti ýurtda soňky 40 ýylda hasaba alnan asman jisimleriniň bäşinji nusgasy boldy. Şaýatlaryň ýatlamaklaryna görä, meteorit ýaşaýyş jaýyndan onlarça metr uzaklykda, adamlaryň işläp ýören pagta meýdanynyň gyrasyna düşüpdir we şowlulyk esasynda hiç kim ýaralanmandyr.

4. Şenbe güni Merkezi Aziýa ýurtlarynda ABŞ-niň Gazagystandaky wekilhanasynyň hemaýat bermeginde guralan “48 sagatda surata düşürmek” atly gysga göwrümli filmleriň bäsleşigine badalga berildi. Bu taslama gatnaşmak üçin 2023-nji ýylda jemi 1403 ýüz tutma berildi, şolaryň 41 sanysy Türkmenistandan. Şu ýylky döredijilik şertleriniň mowzuklary: predmet – köpri, gahryman – masgarabaz (kloun), jümle – “Bu heniz soňy däl!”. Bäsleşigiň şertlerine görä, kinorežssýorlar keşbi, predmeti we jümläni gönüden-göni ýa-da göçme manyda filmiň sýužetine goşmalydyrlar. Bäsleşigiň baş baýragy – Nýu-Ýork Kino Akademiýasynda bilim almak.

Dünýäde

5. Astrahanyň gämi gatnaw kompaniýalary Hazar deňzinde Astrahan bilen Türkmenbaşy Halkara deňiz portunyň arasynda gämi gatnaw liniýasynyň döredilmegine gatnaşmaga taýýar. Bu barada Astrahan oblastynyň gubernatory Igor Babuşkin Peterburg halkara ykdysady forumyň çäklerinde habar berdi. Onuň bellemegine görä, sebitde floty ösdürmek mümkinçiligi bar. Astrahanyň gämi gurluşyk kompaniýalary Hazaryň gämi gatnaw liniýalarynda işlemek üçin gämi gurmaga taýýardyr.

6. Los-Anjelesli gozgalmaýan emläk boýunça agent miras hökmünde galan jaýyň ýerzemininde bir penni nominaly bolan 800 müň sany teňňeden ybarat hazyna tapdy. Teňňeler torbalara, şaýylyklary saklamak üçin bank haltalaryna we süýt torbalaryna salnypdyr. Deslapky çaklamalara görä, tapylan teňňeleriň sany 8 müň dollara barabar bolupdyr, emma hazynanyň tapylanyna bir ýyl töweregi wagt geçen hem bolsa, hazynanyň eýesi henizem olaryň takyk sanyny aýdyp bilmeýär.

Sport habarlary

7. Bişkekde geçirilen ýaşlaryň arasynda erkin göreş boýunça Aziýa çempionatynda 125 kilograma çenli agram derejesinde altyn medal gazanan ýeňiji kesgitlenildi. Bu derejä türkmen türgeni Zyýamuhammet Saparow mynasyp boldy, ol final tutluşygynda gazagystanlyn Abylaý Sowetden üstün çykdy. Bu agram derejesinde kambojaly Bali Sou we özbegistanly Namoz Abduraşidow bürünç medala eýe boldular.

8. Özbegistanyň milli ýygyndysy Merkezi Aziýanyň Futbol Assosiasiýasynyň çempionatynyň toparçalaýyn tapgyrynyň soňky oýnunda Täjigistanyň toparyny ýeňdi we ýaryşyň finalyna çykdy. Final duşuşygynda Özbegistanyň milli ýygyndysy Eýranyň topary bilen oýnar. 3-nji ýer ugrundaky oýunda Gyrgyzystanyň milli ýygyndysy toparçadan çykmak boýunça aýgytly oýunda Türkmenistany 2:0 hasabynda ýeňen Omanyň topary bilen duşuşar. Final we üçünji ýer ugrundaky duşuşyklar 20-nji iýunda Daşkende geçiriler.

9. Woleýbol boýunça Türkmenistanyň milli ýygyndysy Merkezi Aziýanyň Woleýbol Assosiasiýasynyň Milletler ligasynyň birinji tapgyrynyň çäklerinde Gyrgyzystan-2 toparyndan 1:3 hasabynda ýeňildi. Çolpon-Atada geçirilýän ýaryşlara ýedi ýygyndynyň – Gyrgyzystanyň, Nepalyň, Mongoliýanyň, Türkmenistanyň, Özbegistanyň, Eýranyň we Gyrgyzystan-2 ýygyndylarynyň gatnaşýandygyny bellemek gerek. Toparlar, ilki bilen, aýlaw ýaryşyny geçirerler we onuň dowamynda bir-biregi bilen bir oýun oýnarlar. Toparçalaýyn tapgyryň ahyrynda ilkinji iki orny eýelän toparlar final duşuşygynda ýeňiji diýen at ugrunda bäsleşerler. Üçünji we dördünji orny eýeleýän toparlar bürünç medallar üçin bäsleşerler.

10. Futbol boýunça Ispaniýanyň milli ýygyndysy Milletler ligasynyň finalynda Horwatiýany ýeňdi. Duşuşygyň esasy we goşmaça wagty 0:0 hasabynda deňme-deň tamamlandy, oýundan soňky penalti urgulary tapgyrynda ispan oýunçylary üstünlik gazandylar. 3-nji ýer ugrundaky oýunda Italiýanyň milli ýygyndysy Niderlandlary 3:2 hasabynda ýeňdi. Geçirilen Milletler ligasynyň çempionaty taryhdaky üçünji çempionat boldy.