Girmek
Habar berşimiz ýaly, şu gün Prezident Serdar Berdimuhamedow sanly ulgam arkaly nobatdaky Hökümet mejlisini geçirdi. Onda ýanwar-fewral aýlarynda milli ykdysadyýetiň pudaklarynda ýerine ýetirilen işleriň jemleri jemlenildi hem-de döwlet durmuşyna dahylly möhüm meseleler ara alyp maslahatlaşyldy.
Mejlisiň barşynda Ministrler Kabinetiniň Başlygynyň orunbasary M.Mämmedowa gözegçilik edýän ulgamynda şu ýylyň başyndan bäri alnyp barlan işleriň netijeleri barada hasabat berdi.
Prezident Serdar Berdimuhamedow hasabaty diňläp, taýýarlanýan tele-radio gepleşikleriniň hilini ýokarlandyrmak, milli taryhy-medeni mirasyň desgalaryny gorap saklamak üçin zerur işleri yzygiderli geçirip durmagyň wajypdygyny nygtady we bu babatda wise-premýere anyk tabşyryklary berdi.
Döwlet Baştutany ýaz we tomus möwsümleriniň başlanmagy bilen, medeniýet edaralarynyň, teatrlaryň we sirk medeni-köpçülik çärelerini, konsertleri, teatrlaşdyrylan sahnalary yzygiderli guramagyň, şeýle hem çagalar üçin goýulýan sahna eserleriniň hem-de çykyşlaryň sanyny artdyrmagyň möhümdigine ünsi çekdi.
— Tele-radio gepleşikler arkaly bu eserleri giňden wagyz etmek zerurdyr — diýip, Prezident Serdar Berdimuhamedow aýtdy we wise-premýere anyk görkezmeleri berdi.