2023-nji ýylyň 10-njy ýanwarynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň II möwsüminiň I saýlama tapgyrynyň II oýny geçirildi. Bu barada TDIM-niň Halkara gatnaşyklary institutynyň web saýtynda habar berilýär.

«Dialog — parahatçylygyň kepili: gadymy eýýamyň diplomatik mirasynda parahatçylyk medeniýeti» atly umumy şygar astynda geçirilýän bu bäsleşigiň II oýny «Gadymy Hytaý siwilizasiýasy: köpdürli medeniýetiň birleşdiriji kuwwaty» atly tema boýunça geçirildi.

Akyl-paýhas bäsleşiginiň II möwsüminiň I saýlama tapgyrynyň II oýnuna Aşgabat şäherinden, Ahal, Balkan, Daşoguz we Mary welaýatlaryndan bäsleşigiň seçip alyş testinde ýokary netije görkezen ýokary synp mekdep okuwçylarynyň jemi 16-sy gatnaşdy.

Bäsleşigiň netijelerine görä, Aşgabat şäheriniň 16-njy orta mekdebiniň 11-nji synp okuwçysy Mekan Agahanow, Balkan welaýatynyň Balkanabat şäheriniň iňlis dili, fizika we matematika dersleri çuňlaşdyrylyp öwredilýän ýöriteleşdirilen 22-nji orta mekdebiniň 11-nji synp okuwçysy Gülsere Garryjaýewa, Mary welaýatynyň Mary şäheriniň iňlis dili we ynsançylyk ugurly okuw dersleri çuňlaşdyrylyp öwredilýän ýöriteleşdirilen welaýat mekdebiniň 10-njy synp okuwçysy Güljan Serdarowa hem-de Daşoguz welaýatynyň Daşoguz şäheriniň 24-nji orta mekdebiniň 10-njy synp okuwçysy Anwar Bekçanow II oýnuň ýeňijileri boldular.

Ýeňijiler we bäsleşige gatnaşyjylar hemaýatkärler tarapyndan taýýarlanylan gymmat bahaly ýadygärlik sowgatlar bilen sylaglandylar. Şeýle-de bäsleşige gatnaşyjylara Hytaý Halk Respublikasynyň Türkmenistandaky ilçihanasy tarapyndan gymmat bahaly ýadygärlik sowgatlar hem gowşuryldy.