Girmek
Halkara Bitaraplyk gününiň öňüsyrasynda, 10-njy dekabrda Türkmenabat şäheriniň Halkara howa menziline barýan uly ýoluň ugrunda her biri 32 maşgala niýetlenen, 4 gatly ýaşaýyş jaýlarynyň 40-sy ulanmaga berildi. Ähli amatlyklary bolan döwrebap jaýlara jemi 1280 maşgala göçüp bardy. Bu barada «Türkmenistan» gazetiniň şu günki sanynda habar berilýär.
Habarda bellenilişi ýaly, esasan, 2-3 otagdan ybarat täze jaýlarda ýaşaýjylar üçin ähli şertler döredilipdir. Öýleriň giň aşhanasy, myhmanlara niýetlenen ýörite jaýy we çagalar otagy zerur durmuş hajatlary bilen üpjün edilipdir. Umumy meýdany 96 gektara barabar bolan täze ýaşaýyş jaý toplumynda ýaşaýjylar üçin ähli amatlyklar göz öňünde tutulypdyr.
Türkmenabat şäher häkimliginiň buýurmasy esasynda bu toplumy Türkmenistanyň Senagat we gurluşyk önümçiligi ministrliginiň «Demirbetonönümleri» we «Demirbetonkonstruksiýa» kärhanalarynyň gatnaşmagynda Türkmenabat şäher häkimligine degişli bolan «Şähergurluşyk we hyzmat» döwlet kärhanasy gurdy. Gurluşyk işlerinde ýerli gurluşyk serişdeleriniň ulanylmagy binalary öz wagtynda ýokary hilli gurmaga mümkinçilik berdi.