Şu gün Türkmenistanyň Jemgyýetçilik guramalarynyň merkezinde Merkezi Aziýa ýurtlarynyň zenanlarynyň Dialogynyň ýyllyk jemleýji maslahaty öz işine başlady.

Merkezi Aziýa ýurtlarynyň Dialogynyň ýyllyk jemleýji maslahaty bu gezek Türkmenistanyň başlyklyk etmeginde geçirilýär. Maslahatyň açylyş dabarasynda Merkezi Aziýa ýurtlarynyň zenanlarynyň Dialogyna şu ýylda başlyklyk ediji hökmünde Türkmenistanyň Milli Geňeşiniň Mejlisiniň Başlygy Gülşat Mämmedowa gutlag sözi bilen çykyş etdi.

Halkara çärä BMG-niň Merkezi Aziýa üçin Öňüni alyş diplomatiýasy boýuna Sebitleýin merkeziniň baştutany Natalýa German, BMG-niň Ösüş Maksatnamasynyň Türkmenistandaky Hemişelik wekili Narine Saakýan, Gazagystan Respublikasynyň Parlamentiniň Mažlisiniň Başlygynyň orunbasary Balaýim Kesebaýewa, Gyrgyz Respublikasynyň Ýokary Geňeşiniň Başlygynyň orunbasary Jamiliýa Isaýewa, Täjigistan Respublikasynyň Hökümetiniň ýanyndaky Zenanlaryň we maşgala işleri boýunça Komitetiň başlygy Hilolbi Kurbonzoda, Özbegistan Respublikasynyň Oliý Mažlisiniň Senatynyň Başlygy Tanzila Narbaýewa, şe şeýle hem ýurdumyzda hereket edýän ilçihanalaryň, halkara guramalaryň we köpçülikleýin habar beriş serişdeleriniň wekilleri gatnaşýarlar.

Halkara maslahatyň çäginde Türkmenistanyň Jemgyýetçilik guramalarynyň merkeziniň eýwanynda sergi guraldy. Sergide türkmen milli el işleri, dokma önümleri, nepis halylar, suratlar, şaý-sepler, küýzeler ýerleşdirildi.

Ýeri gelende belläp geçsek, bu köptaraplaýyn dialog 2020-nji ýylyň dekabrynda Türkmenistanyň, Gazagystan Respublikasynyň, Gyrgyz Respublikasynyň, Täjigistan Respublikasynyň we Özbegistan Respublikasynyň wekilleri tarapyndan BMG-niň goldamagynda döredilipdi. Ol Merkezi Aziýanyň taryhynda şeýle görnüşdäki ilkinji düzümdir.