Girmek
Şu gün Ýokary liganyň ýaşlar toparlarynyň arasynda Türkmenistanyň futbol birinjiliginiň täze möwsümine badalga berildi. Bu barada TFF-niň resmi saýty habar berýär.
Geçen ýylda bolşy ýaly, birinjilik ugrunda şu ýyl 8 topar ýaryşýar.
Dört duşuşykdan ybarat bolan 1-nji tapgyryň bir duşuşygynda «Ahal» «Nebitçä» asla mümkinçilik galdyrmady. Duşuşygyň «Ahalyň» ýaşlarynyň 5:1 hasabyndaky ýeňşi bilen tamamlandy. «Şagadamyň» ýaşlary bolsa «Aşgabadyň» ýaş futbolçylaryny 2:1 hasabynda ýeňdiler. Edil şeýle hasap bilen tamamlanan başga bir duşuşykda «Köpetdag-2» «Merwiň» ýaşlaryndan üstün çykdy. «Altyn asyryň» ýaşlar düzümi bolsa «Energetigiň» ýaşlaryny 6:0 hasabynda ýeňdi.
Ýaşlaryň arasynda milli birinjiligiň 2-nji tapgyrynyň duşuşyklary 14-nji awgustda geçiriler. Şu ýyl bu ýaryşyň iki aýlawdan ybarat boljakdygyny ýatladýarys.
Ýaryş 2019-njy ýylda esaslandyrylypdy. Şol ýyldan bäri yzda galan üç möwsüm hem «Altyn asyr-2»-niň çempionlygy bilen tamamlandy.