Şu gün Türkmenbaşynyň halkara deňiz portunda gümrük amallaryny we hyzmatlary kämilleşdirmek boýunça pudaga iş toparynyň duşuşygy geçirildi. Duşuşygyň barşynda «Sanly Çözgüt IT meýdança» hojalyk jemgyýetiniň hünärmenleri, Türkmenbaşy halkara deňiz portunyň hyzmatlaryndan peýdalanýan müşderileriň arzalaryny Internet tory arkaly uzak aralykdan bermekleri üçin işlenip taýýarlanylan täze programma üpjünçiligini hödürlediler. Bu barada Türkmenistanyň Döwlet gümrük gullugynyň resmi web saýtynda habar berilýär.

Duşuşyga Döwlet gümrük gullugynyň harby gullukçylary, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň wekilleri, Türkmenbaşy halkara deňiz portunda gümrük amallaryna gatnaşýan gümrük dellallarynyň hem-de ýük we gümrük amallaryny sanlylaşdyrmak işlerine gatnaşýan «Sanly Çözgüt IT meýdança» hojalyk jemgyýetiniň we «Asman oky» hususy kärhanasynyň hünärmenleri gatnaşdylar.

Duşuşykda gümrük edaralarynda ornaşdyrylan sanly ulgamyň mümkinçilikleri we ony Türkmenbaşy halkara deňiz portunda ýük işleri üçin işlenip taýýarlanylan täze programma üpjünçiligi bilen utgaşdyrmagyň ýollary barada pikir alşyldy.

Şeýle hem, Türkmenistanyň çäginden geçýän üstaşyr ulag geçelgeleriniň özüne çekijiligini we sebitdäki ähmiýetini ýokarlandyrmakda wajyp logistik toplum bolan Türkmenbaşy halkara deňiz portunyň üstünden haryt dolanyşygynyň çaltlandyrylmagyna ýardam berýän şertleri giňeltmegiň ugurlary ara alnyp maslahatlaşyldy we bu ugurda teklipler jemlenildi.

Ýadyňyzda bolsa, mundan öň biz size Türkmenistanyň gümrük gullugynyň işgärleriniň ministrlikler bilen «Bir penjire» ulgamyny ornaşdyrmak barada duşuşyk geçirendikleri barada habar beripdik.