Köpugurly «Aşgabat» stadionynyň tennis meýdançalarynda uly tennis boýunça ýurduň çempionaty başlandy we ol Aşgabadyň 140 ýyllygyna bagyşlanýar ― diýip, «Türkmenistan: Altyn asyr» habar berýär.

Bu ýaryş iki topara bölünip geçirilýär. Birinji toparda 12 – 14 ýaşly we 12 ýaşly hem-de ondan kiçi çagalar birinji ýeri almak ugrunda bäşleşseler, ikinji toparda ýaşy 14-den ýokary erkek we aýal türgenler ýurduň çempiony diýen hormatly at üçin özara güýç synanyşarlar.

Ýaryşlara tutuş Türkmenistandan jemi 140-a golaý türgen gatnaşýar. Ýurduň çempionatynda ýekebara çykyşlara goýulýan medallardan daşgary oglanlaryň arasynda iki bolup oýnalýan tennis boýunça-da sylagly orunlar üçin bäsleşiljekdigini aýratyn bellemelidiris.