Şu günler Amerikanyň Birleşen Ştatlarynda geçirilýän agyr atletika boýunça dünýä çempionatynda ildeşlerimiz kümüş medallaryň ýene-de üçüsini gazandylar. Bu gezek Ýapyk binalarda we söweş sungaty boýunça V Aziýa oýunlarynyň altyn medalçysy Rejepbaý Rejebow 77 kilogram agram derejesindäki türgenleriň arasynda ýaryşyp, silkip götermekde 158, itekläp götermekde 194, umylykda bolsa 352 kilogram netije bilen, aýratyn görnüşler boýunça-da, umumy netije boýunça-da kümüş medala mynasyp boldy. Şeýlelikde, Agyr atletika boýunça XXVI dünýä çempionatynda milli ýygyndymyz medallarynyň sanyny 6-a çykaryp, ýaryşa gatnaşyjy 68 döwletiň arasynda umumy netije boýunça (diňe jemleýji netije hasaba alnanda) 9-njy, aýratyn görnüşler boýunça gazanylan medallar goşulanda bolsa 11-nji orna mynasyp boldy. Ýöne 5-nji dekabra çenli dowam etjek etjek dünýä çempionatynda ýene-de iki türgenimiz ýaryşar. Olar 2014-nji ýylda ýaşlaryň arasynda geçirilen dünýä çempionatynyň bürünç medalçysy Daýanç Aşyrow bilen "Aşgabat 2017-niň" kümüş medalyna mynasyp bolan Hojamuhammet Toýçyýewdir.

Mälim bolşy ýaly, geçen hepdäniň anna gününde türkmenistanly zenan türgen Kristina Şermetowa hem dünýä çempionatynda ajaýyp üstünlik gazanyp, 24 ýyldan soň agyr atletika boýunça dünýä çempionatymyzda ilkinji medallarymyza eýe bolupdy.

Halkara ýaryşlara 2011-nji ýyldan bäri gatnaşyp gelýän Rejepbaý Rejebow jemi 13 gezek halkara synagyna çykdy. Şolaryň 4-si dünýä çempionatlary, 7-si Aziýa çempionatlary, 2-si bolsa dürli ýyllarda geçen uniwersiadalardyr. Şol halkara ýaryşlarda Rejepbaýyň 2 altyn, 2 kümüş medaly bar. Ýöne bu görkezijiler umumy netije boýunçadyr. Çünki agyr atletika ýaryşlarynda her görnüş boýunça aýratyn medal gowşurylýar.

Şahsy rekordyny Aşgabat Aziadasynda goýan türgen (353 kilogram) bu gezek şol netijä bary-ýogy bir kilogram ýetip bilmedi. Ýöne bu ýagdaý onuň dünýä çempionatynyň kümüş medala mynasyp bolmagyna böwet bolup bilmedi. Ýeri gelende aýtsak, 77 kilograma çenli türgenleriň ýaryşynda birinji orna müsürli türgen Mohamed Mahmud (361 kilogram), üçünji orna bolsa ýerli türgen Harrison Maurus (348 kilogram) mynasyp boldy