Birleşen Milletler Guramasynyň Baş Assambleýasy tarapyndan tassyklanan Türkmenistanyň oňyn Bitaraplyk syýasaty sebitde durnuklylygy üpjün etmegiň nusgalyk modeli boldy. Bu barada Eýranyň Türkmenistandaky ilçisi Ali Mojtaba Ruzbehani Türkmenistanyň Garaşsyzlygynyň 35 ýyllygyna bagyşlanan makalasynda aýtdy.

Diplomatyň bellemegine görä, «Demirgazyk–Günorta» we «Gündogar–Günbatar» üstaşyr geçelgelerinde möhüm orun eýeleýän we energetika infrastrukturasyny ösdürýän Türkmenistan Aziýada ykdysady integrasiýany hem-de howpsuzlygy pugtalandyrmaga netijeli goşant goşýan güýje öwrüldi. Ilçiniň sözlerine görä, Aşgabat sebitde ykdysady gatnaşyklary, energetika alyş-çalşygyny we harytlaryň üstaşyr geçirilmegini üpjün edýän howpsuz şertleri döretmegi başardy.

Ruzbehani Eýranyň Türkmenistanyň Garaşsyzlygyny ilkinji bolup ykrar eden döwletleriň biridigini ýatlatdy. Onuň sözlerine görä, iki ýurduň arasyndaky hyzmatdaşlyk milli özygtyýarlylyga hormat goýmak we sebitdäki durnuklylygy goldamak ýörelgelerine esaslanýar. Diplomatyň bellemegine görä, Tähranyň we Aşgabadyň jogapkärçilikli syýasaty Eýranyň demirgazyk-gündogar serhetlerini asudalygyň, söwdanyň we dostlugyň giňişligine öwürdi hem-de üstaşyr ýük daşamalaryny ösdürmek üçin şertleri döretdi.

Ilçi şeýle hem Eýranyň we Türkmenistanyň bitewi siwilizasion we medeni giňişlikde ösýändigini, umumy ruhy mirasyň we gadymy Ýüpek ýolunyň iki halkyň häzirki gatnaşyklary üçin binýat bolandygyny nygtady.

Türkmenistanyň Garaşsyzlygynyň 35 ýyllygy bilen gutlap, Ruzbehani Eýranyň strategik goňşusy hökmünde Türkmenistan bilen hemmetaraplaýyn hyzmatdaşlygy giňeltmäge taýýardygyny mälim etdi.