Türkmenistanyň Prezidentiniň ýanyndaky Döwlet gullugy akademiýasynyň wekiliýeti Azerbaýjanda geçen «Sanlylaşdyrmak we emeli aň eýýamynda adam maýalary: ösüş, geljekki mümkinçilikler we ýüzbe-ýüz bolunýan kynçylyklar» adly V maslahata gatnaşdy.

Çäräni Azerbaýjan Respublikasynyň Döwlet synag merkezi gurady. Maslahata Türki Döwletler Guramasyna (TDG) agza döwletleriň adam maýalaryny ösdürmek boýunça degişli edaralarynyň wekilleri, şeýle hem döwlet dolandyryş edaralarynyň ýolbaşçylary, IT hünärmenleri we sanlylaşdyrmak hem-de emeli intellekt ulgamlary boýunça hünärmenler gatnaşdylar.

Maslahata gatnaşyjylar döwlet dolandyryş ulgamyna sanly tehnologiýalary we emeli intellekti ornaşdyrmak, şeýle hem döwlet hyzmatlarynyň hilini ýokarlandyrmak ýaly meseleleri ara alyp maslahatlaşdylar.

Forumyň dowamynda türkmen akademiýasynyň wekilleri halkara bilermenler we beýleki ýurtlaryň dolandyryş akademiýalarynyň wekilleri bilen pikir alyşdylar. Bellenilişi ýaly, bu sanlylaşdyrmak şertlerinde döwlet gullukçylaryny taýýarlamagyň häzirki zaman hünär ölçeglerini we halkara tejribesini jemlemäge, şeýle hem olary milli bilim tejribeligine ornaşdyrmaga ýardam eder.