«Marvel» we «DC» filmleriniň super gahrymanlary baradaky kino eserlerinden alnan simfoniki sazlar ilkinji gezek Türkmenistanyň Magtymguly adyndaky milli sazly drama teatrynyň sahnasynda Tahyr Ataýewiň orkestriniň janly ýerine ýetirmeginde ýaňlandy.

Konserte dürli ýaşdaky we dürli toparlardan tomaşaçylar ýygnandy. Olaryň arasynda ýaşlar hem, ulular hem, dostlar toparlary hem, çagaly maşgalalar hem bardy. Konsertiň maksatnamasyna «Demir adam», «Akwamen», «Möý adam», «Betmen», «Galaktikanyň goragçylary», «Adalat ligasy», «Ar alyjylar», «Polatdan ýasalan adam», «Iks-adamlar», «Fleş», «Gudratly zenan» we «Tor» filmlerinden saz temalary girizildi. «DC» filmleriniň dartgynly we dramatik sazlary Marvel äleminiň joşgunly hem-de hereketli sazlary bilen gezekleşdi.

Agşamy açmak bilen, Tahyr Ataýew saz älemleriniň arasyndaky garşylygy «duel» bilen deňeşdirdi we tomaşaçylary wizual goşundy görkezilýän ekrana ünsüni sowman, simfoniki sazy janly görnüşde diňlemäge çagyrdy. Onuň sözlerine görä, kinoteatrlarda tomaşaçylar köplenç filmiň sazyny ahyrky titrlere çenli diňlemän, zaldan çykyp gidýärler. Şol bir wagtyň özünde sazy janly ýerine ýetirişde diňlemek has täsirli tejribe bolup durýar.

Konsertden soň Turkmenportal saýtyna beren interwýusynda toparyň ýolbaşçysy Tahyr Ataýew orkestriň sekiz ýyl ozal kiçeňräk sazandalar düzümi bolan kirişli saz gurallar topary hökmünde işe başlandygyny, häzirki wagtda bolsa onuň kiçi hem-de uly simfoniki düzümlerden ybaratdygyny gürrüň berdi. Onuň sözlerine görä, sazandalar topary dürli žanrlar bilen yzygiderli tejribe geçirýär: filmlerden we wideo oýunlaryndan sazlary, şeýle hem nusgawy eserleri ýerine ýetirýär.

«Marvel» we «DC» baradaky maksatnamanyň pikiri takmynan bir ýylyň dowamynda kemala gelip, tomaşaçylaryň köp sanly haýyşlarynyň esasynda durmuşa geçirildi. «Bu saza isleg bar, onuň muşdaklary hem bar. Şonuň üçin olara üns bermezlik mümkin däl» — diýip, dirižýor belledi. Şeýle hem ol orkestriň tomaşaçylarynyň täze maksatnamalary taýýarlamakda köplenç ylham çeşmesine öwrülýändigini aýtdy.

Ataýew çagaly maşgalalaryň simfoniki saza bolan gyzyklanmasynyň hem ony aýratyn begendirýändigini belledi. «Ene-atalar çagalaryny şeýle çylşyrymly, ýöne gyzykly sungat bilen tanyşdyrmak üçin alyp gelýärler. Bu, ilkinji nobatda, ruhy taýdan baýlaşmakdyr» — diýip, ol nygtady.

Tahyr Ataýewiň sözlerine görä, orkestr geljekde «Marvel» we «DC» temasyny täze saundtrekler bilen dowam etdirmegi, şeýle hem wideo oýunlarynyň sazlaryna bagyşlanan maksatnamanyň ikinji bölümini çykarmagy meýilleşdirýär. Oktýabr aýynda topar esaslandyrylan gününiň sekiz ýyllygyny bellär.

Ilkinji «MARVEL vs DC» konserti şowhunly el çarpyşmalar bilen tamamlandy — tomaşaçylar orkestri ýerlerinden turup el çarpyp ugratdylar. Tahyr Ataýew mukamlary mähirli kabul edendikleri üçin tomaşaçylara minnetdarlyk bildirdi we indiki konsertiň geçiriljek senesini öňünden habar berjekdigini aýdyp, ähli myhmanlary indiki konsertlere hem işjeň gatnaşmaga çagyrdy.