Serginlediji içgiler hem-de ter miwe şireleri bilen bezelen tekjeler 2026-njy ýylyň 17-nji sentýabrynda Aşgabatdaky Söwda-senagat edarasynyň binasynda açylan Türkmenistanyň ykdysady üstünlikleriniň sergisine gelenleriň ünsüni ilkinji pursatlardan özüne çekdi. Türkmenistanyň Garaşsyzlygynyň 35 ýyllygyna bagyşlanan bu sergi 19-njy sentýabra çenli dowam edip, ministrlikleriň we pudaklaýyn dolandyryş edaralarynyň, Senagatçylar we telekeçiler birleşmesiniň, ýerli işewür düzümleriň wekillerini hem-de daşary ýurtly hyzmatdaşlary bir ýere jemlär.

Serginiň iň özüne çekiji diwarlyklarynyň biri hem alkogolsyz içgileri we miwe şirelerini öndürýän öňdebaryjy türkmen kärhanalarynyň biri bolan «Ýüpekçi» hojalyk jemgyýetiniň diwarlygy boldy.

Serginiň myhmanlary «Ýüpekçi» hojalyk jemgyýetiniň hödürleýän önümleriniň görnüşleri, şol sanda meşhur brendler we täze önümler bilen ýakyndan tanyşyp bilerler. Kompaniýanyň diwarlygynda adaty alkogolsyz içgiler bilen bir hatarda, alyjylaryň dürli derejelerine niýetlenen döwrebap tagam çözgütleri hem görkezilýär.

Hödürlenýän önümleriň arasynda ýurtda giňden tanalýan «Bold», «Softea», «RealCola» we «Buzz» haryt nyşanly gazly içgiler, miwe şireleri hem-de beýleki alkogolsyz serginlediji içgiler bar.

Ýubileý sergisine gatnaşmak «Ýüpekçi» kompaniýasyna öz gazanan üstünliklerini giň köpçülige görkezmäge we türkmen bazarynda ýokary hilli içgileri öndürýän ygtybarly öndüriji hökmündäki abraýyny ýene bir gezek tassyklamaga giň mümkinçilik döretdi.