Tomus paslynda ýabany haýwanlar köplenç kölegeli jülgelere çekilýärler. Emma jöwzaly yssy hemme zady — ot-çöpleri we ownuk çeşmeleri guradýar. Şonuň üçin Türkmenistanyň Köpetdag döwlet tebigy goraghanasynyň işgärleri hepdede bir gezek suw getirip, jülgedäki daşlaryň içindäki oýuklary 100–200 litre çenli suwdan doldurýarlar. Şeýlelikde, haýwanlar üçin emeli suw içilýän howuzlar döredilýär. Bu barada «Neýtralnyý Turkmenistan» gazeti habar berýär.

«Haýwanlaryň ýagdaýynyň nähili kyndygyny göz öňünde tutup, ýaşaýyş üçin şunuň ýaly möhüm pursatda olary ýeke goýup bilmejekdigimize düşündik. Emeli suw içilýän ýerler daglaryň orta belentliklerinde ýaşaýan toýnakly haýwanlara we beýleki jandarlara yssy howanyň iň ýokary döwründen aman geçmeklerine göni manyda kömek edýär. Bu çäräniň daglaryň aşaky guşaklyklaryndaky biodürlüligiň durnuklylygyna ýetirýän oňyn täsirine ýokary baha bermezlik asla mümkin däl» — diýip, gözegçi Kerwen Hajyýew belleýär.

Goraghananyň işgärleri haýwanlara awtomatiki kameralaryň — «foto duzaklaryň» kömegi bilen yzygiderli gözegçilik edýärler. Gözegçiligiň bu görnüşi olaryň ýaşaýan çäkleri, ýyrtyjy haýwanlaryň aw meýdanlary barada maglumat almaga, şeýle hem köpelişdäki haýwanlaryň sanyna takmynan baha bermäge mümkinçilik berýär. Sebäbi olaryň köpüsi uzak aralyklara, käte döwletara serhetlerinden hem geçip, başga ýerlere göçýärler. Mysal üçin, alajagaplaň ýaly iri we çalasyn ýyrtyjy haýwan Eýrana çenli baryp, soňra öz mesgenine yzygiderli gaýdyp gelýär.

Ýakynda Kişmirli jülgesiniň tokaý görnüşli gyrymsy ösümlikler bilen örtülen ýerlerinde ýerleşdirilen «foto duzak» owlakly dag goçlarynyň (haýwanlaryň goşatoýnaklylar urugynyň gyn şahlylar maşgalasyna degişli süýdemdiriji görnüşi) sürüsini hasaba aldy. Şol ýerde ýigrimi çemesi başdan ybarat, ýaş haýwanlary hem bolan ýabany doňuzlar sürüsi hem ýüze çykaryldy. Şarlawuk derýasynyň gözbaşynda bolsa ene alajagaplaňyň we onuň çagasynyň bardygy anyklandy.