Belarus Respublikasynyň Türkmenistandaky ilçihanasy resmi saýtynda çap eden habarynda wizany resmileşdirmek, hukuk bozulmalary barada güwänama almak hem-de resminamalary kanunlaşdyrmak meseleleri boýunça raýatlary kabul etmek üçin elektron nobat ulgamyna geçýändigini mälim etdi.

Elektron nobat ulgamy arkaly kabul edişlige ýazylmak 2026-njy ýylyň 1-nji sentýabryndan başlanar.

Elektron nobata ýazylmak üçin ilçihananyň resmi saýtynyň baş sahypasyndaky degişli salgydan peýdalanmaly.

Şu ýylyň 31-nji awgustyny hem goşmak bilen, öňki tertip saklanyp galýar. Şol senä çenli kabul edişlige +993 12 48 29 27 telefon belgisi arkaly duşenbe gününden anna gününe çenli, sagat 11:00-dan 13:00-a çenli ýazylyp bolýar.