Türkmen dzýudoçysy Maýsa Perdäýewa Hytaýyň Sindao şäherinde geçirilen dzýudo boýunça Gran-pri ýaryşynyň ýeňijisi boldy.

57 kilograma çenli agram derejesinde geçirilen final duşuşygynda Perdäýewa Fransiýanyň wekili Marta Fawazy ýeňip, altyn medala mynasyp boldy.

Sindaoda geçirilýän ýaryş 28-nji iýunda tamamlanýar. Bu ýaryş 2028-nji ýylda ABŞ-nyň Los-Anjeles şäherinde geçiriljek Olimpiýa oýunlaryna saýlama tapgyrynyň ikinji ýaryşydyr.

21 ýaşly Maýsa Perdäýewa mundan ozal Mongoliýanyň Ulan-Bator şäherinde geçirilen «Uly tuwulga» tapgyrynda bürünç medal gazanypdy. Ol 2024-nji ýylda Parižde geçirilen Olimpiýa oýunlarynda Türkmenistanyň milli ýygyndysynyň düzüminde çykyş edipdi.