Hepdäniň sişenbe güni Gruziýanyň Samshe-Jawaheti ülkesindäki Ahalkalaki bekedinde Baku-Tbilisi-Kars demir ýolunyň resmi açylyş dabarasy boldy. Ol Gruziýanyň, Azerbaýjanyň hem-de Türkiýäniň bilelikde amala aşyran taslamasydyr, ýagny bu demir ýoly azerbaýjan-gruzin-türk döwletara ylalaşyga laýyklykda guruldy diýip, «Sinhua» agentligi habar berdi.

Açylyş dabarasynda çykyş eden Gruziýanyň premýer-ministri Irakliý Kobahidze BTK taslamasynyň taryhy ähmiýetini hem-de üç ýurduň arasynda strategik hyzmatdaşlygyň we nusgalyk gatnaşyklaryň aýdyň nyşanydygyny nygtady.

2017-nji ýylda bu demir ýol ugry synag tertibinde işe goýberileninden bäri ondan 1,8 million tonna ýük we 90 müň töweregi konteýner gatnadyldy. «Doly işe goýberilenden soňra demir ýoluň geçirijilik mümkinçilikleri ýylda 5 million tonna deň bolar, bu sebitiň üstaşyr ýük daşamak mümkinçiliklerini artdyrar we Orta geçelgäniň bäsdeşlige ukyplylygyny ýokarlandyrar» diýip, Kobahidze belledi.