Hüjümçi Serdar Azmun ABŞ-da, Kanadada we Meksikada geçiriljek futbol boýunça 2026-njy ýylyň dünýä çempionatyna gatnaşjak Eýranyň milli ýygyndysynyň gutarnykly düzümine girizilmedi. 26 futbolçydan ybarat sanaw milli ýygyndynyň resmi sosial neşirleriniň sahypalarynda çap edildi.

Kazanyň «Rubin», Rostowyň «Rostow» hem-de Sankt-Peterburgyň «Zenit» toparlarynyň öňki oýunçysy bolan Azmun 2025-nji ýylyň martyndan bäri milli ýygynda çagyrylmady. Şeýle hem ol öňünden yglan edilen giňeldilen düzümiň sanawyna hem goşulmady.

Käbir köpçülikleýin habar beriş serişdeleriniň maglumatlaryna görä, munuň sebäbi futbolçynyň Birleşen Arap Emirlikleriniň wekilleri bilen bile düşen suratlary bolup biler.

Azmun bolsa öz sosial media sahypalarynda Eýranyň «onuň ýüregi we buýsanjy» bolup galýandygyny belläp, milli ýygynda dünýä çempionatynda üstünlik arzuw etdi.

Dünýä çempionaty 11-nji iýun bilen 19-njy iýul aralygynda geçiriler. G toparçada çykyş etjek Eýranyň ýygyndysy toparçalaýyn tapgyrda Täze Zelandiýanyň milli ýygyndysy (15-nji iýun), Belgiýanyň milli ýygyndysy (21-nji iýun) we Müsüriň milli ýygyndysy (26-njy iýun) bilen duşuşar.