Türkmenistanda umumybilim berýän mekdepleriň okuwçylarynyň arasynda «Sebitleýin ekologiýa we ýaşyl başlangyçlar» atly ekologiki taslamalaryň bäsleşigi geçirilýär. Ony Türkmenistanyň Senagatçylar we telekeçiler partiýasynyň Aşgabat şäher komiteti guraýar.

Bäsleşik daşky gurşawy goramak ulgamynda okuwçylaryň amaly we innowasion pikirlerini ýüze çykarmaga gönükdirilendir. Gatnaşyjylar dört ugur boýunça taslamalaryny hödürläp bilerler: serhetara suw serişdelerini rejeli peýdalanmak we damjalaýyn suwarmagyň täze usullary, çölleşmä garşy göreşmek üçin «ýaşyl» zolaklary döretmek, polimer galyndylaryny gaýtadan işlemek, şeýle hem daşky gurşawyň ýagdaýyny gözegçilikde saklamak üçin sanly tehnologiýalary we sensorlary ulanmak.

Bäsleşige Türkmenistanyň mekdepleriniň okuwçylary gatnaşyp bilerler, emma olaryň taslamalary öň başga bäsleşiklerde hödürlenmedik bolmaly. Arza we taslama meýilnamasy bilen bilelikde gatnaşyjynyň şahsy maglumatlary — ady, familiýasy, mekdebiniň ady, synpy we aragatnaşyk üçin telefon belgisi görkezilmelidir. Her gatnaşyjy diňe bir taslama hödürläp biler.

Arzalar 2026-njy ýylyň 10-njy maýyna çenli kabul edilýär. Işler tstp.ashgabat22@gmail.com elektron salgysyna iberilmeli. Iň gowy taslamalar bilermenler topary tarapyndan saýlanyp alnandan soň, jemleýji tapgyr — eminler toparynyň öňünde açyk goralar.

Bäsleşik 2026-njy ýylyň 13-nji maýynda tamamlanar. Üç ugur boýunça ýeňijiler — bir birinji, iki ikinji we üç üçünji orunlaryň eýeleri — Türkmenistanyň Bilim ministrliginiň we Senagatçylar hem-de telekeçiler partiýasynyň Merkezi geňeşiniň Hormat hatlary, şeýle hem gymmat bahaly sowgatlar we höweslendiriji baýraklar bilen sylaglanarlar.

Gatnaşmak bilen bagly soraglar boýunça partiýanyň Aşgabat şäher komitetiniň guramaçylyk we syýasy işler bölümi bilen 22-74-07 we 22-70-38 telefon belgileri arkaly, şeýle hem Aşgabat şäheri, S. Türkmenbaşy şaýoly, 81, 3-nji gat salgysy boýunça habarlaşyp bolar.