Aşgabatdaky Rus öýünde beýik rus kompozitory, pianisti we dirižýory Sergeý Prokofýewiň doglan gününiň 135 ýyllygyna bagyşlanan sazly agşam geçirildi.

Rus öýüniň metbugat gullugynyň habar bermegine görä, diňleýjileriň öňünde Türkmenistanyň at gazanan artisti Aýna Seýitgulyýewa, Türkmenistanyň halk artisti Gülnar Nuryýewa, halkara baýraklarynyň eýesi Seýran Atanyýazow (skripka), Emir Baýramgeldiýew (fleýta) hem-de halkara bäsleşikleriň diplomanty Stella Faramazowa (fortepiano) çykyş etdiler.

Bir sagat dowam eden maksatnama kompozitoryň meşhur eserlerini öz içine aldy: «Üç apelsine söýgi» operasyndan marş, «Zoluşka» baletinden wals, Agniýa Bartonyň sözlerine döredilen «Boltunýa» aýdymy, «Çagalar aýdymlary» toplumyndan bölekler, «Romeo we Juliýetta» baletinden «Montekki we Kapuletti» atly rysarlar tansy, fleýta we fortepiano üçin 2-nji sonata, Anna Ahmatowanyň goşgularyna ýazylan romanslar, Aleksandr Puşkiniň sözlerine döredilen «Katerina» we «Seniň ýagty otagyňa» eserleri. Konsert «Uruş we parahatçylyk» operasyndan iki wals bilen tamamlandy.

Çäräniň çäklerinde myhmanlar Sergeý Prokofýewyň ömri we döredijiligine bagyşlanan «Asyryň gurşawynda goşa portret» atly planşet sergisi bilen tanyşdylar. Sergi Russiýanyň milli saz muzeýi tarapyndan hödürlendi.