Rumyniýaly futbol tälimçisi Mirça Luçesku 2026-njy ýylyň 7-nji aprelinde Buharest şäherinde ýürek tutgaýyndan soň aradan çykdy. Ol 80 ýaşyndady — diýip, sports.ru neşiri habar berýär.

Tälimçilik eden döwründe Luçesku «Korwinul» (Hunedoara), «Dinamo» we «Rapid» (ikisi hem Buharest), Italiýanyň «Breşia», «Piza», «Reggiana» we «Inter» klublarynda, Türkiýäniň «Galatasaraý» we «Beşiktaş» toparlarynda, Donesk şäheriniň «Şahtýor» klubynda (2004–2016), Sankt-Peterburgyň «Zenit», Kiýewiň «Dinamo» toparlarynda işledi, şeýle hem Rumyniýanyň we Türkiýäniň ýygyndylaryna ýolbaşçylyk etdi.

Onuň tälimçilik ýolunyň iň meşhur döwri Donesk şäheriniň «Şahtýor» klubynda geçen 12 ýyl boldy. Hut onuň ýolbaşçylygynda bu topar Ukrainanyň futbolynda agdyklyk edýän güýçleriň birine öwrüldi. Esasy Ýewropa üstünligi bolsa 2009-njy ýylda gazanylan UEFA-nyň kubogy boldy — bu häzirki wagta çenli ukrain klublarynyň iň soňky Ýewrokubok ýaryşyndaky ýeňşi bolup durýar.

Tälimçi hökmünde Luçesku dürli ýurtlarda jemi 38 resmi kubogy gazandy, bu bolsa dünýä futbolynyň taryhynda iň ýokary görkezijileriň biridir.

29-njy martda Luçeskunyň Rumyniýanyň milli ýygyndysynyň türgenleşiginiň öňüsyrasynda gyssagly hassahana ýerleşdirilendigi mälim boldy. Soňra ol ýürek tutgaýyny geçirdi. Anna güni hünärmeni hassahanadan çykarmak meýilleşdirildi, emma ýagdaýynyň agyrlaşmagy sebäpli ol reanimasiýa bölümine geçirildi. Ýekşenbe gününe geçilýän gijede tälimçiniň bedeni bejergä jogap bermegini bes etdi, şonuň netijesinde ol anesteziologiýa we intensiw bejeriş bölümine geçirildi hem-de emeli koma ýagdaýyna goýuldy.

Rumyniýanyň futbol federasiýasy tälimçiniň aradan çykmagy sebäpli gynanjyny bildirip, ony «ady hakyky rowaýata öwrülen» diýip atlandyrdy. Rumyniýanyň çempionatynyň oýunlary onuň hatyrasyna bir minutlyk dymyşlyk bilen başlanar. Şeýle hem federasiýa täze baş tälimçini saýlamak işini näbelli möhlete çenli togtatdy.

Luçeskunyň ýolbaşçylygyndaky iň soňky oýun 2026-njy ýylyň dünýä çempionatynyň Ýewropa saýlama tapgyrynyň pleý-off ýarym finalynda Rumyniýanyň Türkiýeden 0:1 hasabynda ýeňilmegi bolupdy.