Soňky habarlar

Arhiw

TÜRKMENISTANYŇ JEMAGAT HOJALYGY INSTITUTY

0
43555
Soňky täzelenme:

2017/2018-nji okuw ýyly üçin hünärmenleri taýýarlamagyň aşakdaky ugurlary (hünärleri) boýunça talyplyga kabul edýändigini yglan edýär:

1. Gurluşyk we binagärlik (hünärler: gozgalmaýan emläkleriň ekspertizasy we dolandyrylyşy; awtomobil ýollarynyň, köprüleriň we tonnelleriň gurluşygy, ulanylyşy we tehniki abatlanylyşy; ýylylyk, gaz üpjünçiligi we howa çalşygy; suw üpjünçiligi, ulanylan suwlary akdyryş we suw gorlaryny goramak).

2. Tehnologik maşynlar we enjamlar (hünär: göteriji, äkidiji, gurluşyk, ýol maşynlary we enjamlary).

3. Energetika (hünär: elektrik üpjünçiligi).

4. Dizaýn (hünär: binagärlik gurşawynyň dizaýny).

5. Pudak kärhanalarynyň ykdysadyýeti we dolandyrylyşy (hünärler: ykdysadyýet we dolandyryş (jemagat hojalygy ulgamy üçin); buhgalter hasaby we audit (jemagat hojalygy ulgamy üçin)).

6. Ýaşaýyş-durmuş howpsuzlygy, tebigy abadanlaşdyrylyş we daşky gurşawy goramak (hünär: tehnosfera howpsuzlygy).

7. Kompýuter tehnologiýasy (hünärler: maglumat ulgamlary we tehnologiýalary; inžener ulgamlary we torlary).

Instituta Türkmenistanyň umumy orta ýa-da orta hünär bilimli, ýaşy 35-den geçmedik raýatlary giriş synaglarynyň netijeleri boýunça bäsleşik esasynda kabul edilýär.

Resmi iş kagyzlary 2017-nji ýylyň 10 — 26-njy iýuly aralygynda Türkmen döwlet binagärlik-gurluşyk institutynda (Aşgabat ş.) kabul edilýär.

Resmi iş kagyzlarynyň sanawy:

— bellenilen nusgada rektoryň adyna ýazylan arza;

— bellenilen nusgadaky sowalnama (anketa);

— umumy orta (ýa-da orta hünär) bilim baradaky resminama (asyl nusgasy);

— Türkmenistanyň Saglygy goraýyş we derman senagaty ministrligi tarapyndan bellenilen nusgadaky saglyk kepilnamasy;

— soňky okan ýerinden (işlän ýerinden, harby bölümden) häsiýetnama;

— 3x4 sm ölçegdäki sekiz sany fotosurat;

— işleýänler üçin zähmet depderçesiniň tassyklanan göçürmesi;

— giriş synaglaryndan üstünlikli geçen ýagdaýynda artykmaçlyklardan peýdalanýan okuwa girýän ýylynda mekdep okuwçylarynyň dersler boýunça döwlet bäsleşiginiň ýeňijileri, umumybilim dersleri boýunça halkara bäsleşiklerine gatnaşan Türkmenistanyň ýygyndy toparynyň agzalary şol ýagdaýlary tassyklaýan degişli resminamanyň asyl nusgasyny tabşyrýar.

Bulardan başga-da, okuwa girmäge isleg bildirýänler ýokarda görkezilen resminamalar bilen birlikde resminamalary kabul edýän iş toparyna aşakdakylary görkezýärler we nusgalaryny tabşyrýarlar:

— şahsy pasportyny;

— Türkmenistanyň Ýaragly Güýçlerinde harby gullugy geçenler harby şahadatnamasyny, harby gullugy geçmedik ýigitler ýazylyş şahadatnamasyny we ýaşaýan ýeri boýunça harby wekillikden güwähatyny.

Dalaşgär talyplyga kabul edilmek üçin artykmaç hukukdan peýdalanýandygyny tassyklaýan beýleki resminamalary görkezip biler.

Nädogry berlen maglumatlar we resmi iş kagyzlary üçin dalaşgär şahsy jogapkärçilik çekýär.

Giriş synaglary we okuwa kabul edilmek Türkmen döwlet binagärlik-gurluşyk institutynda aşakdaky möhletlerde geçirilýär:

Ahal welaýaty — iýul aýynyň 30-31-i, awgust aýynyň 3-i we 5-i günleri

Aşgabat şäheri  — awgust aýynyň 1-2-si, 4-i we 6-sy günleri

Balkan welaýaty  — awgust aýynyň 7-8-i, 11-i we 13-i günleri

Daşoguz welaýaty — awgust aýynyň 9-10-y, 12-si we 14-i günleri

Lebap welaýaty — awgust aýynyň 15-16-sy, 19-y we 21-i günleri

Mary welaýaty — awgust aýynyň 17-18-i, 20-si we 22-si günleri

Giriş synaglary aşakdaky dersler boýunça geçirilýär:

binagärlik gurşawynyň dizaýny hem-de tehnosfera howpsuzlygy hünärleri — surat we grafika, matematika, Türkmenistanyň taryhy;

galan hünärler — fizika, matematika, Türkmenistanyň taryhy.

Dersler boýunça giriş synaglary Türkmenistanyň orta mekdepleriniň okuw maksatnamalarynyň esasynda geçirilýär.

Dersler boýunça giriş synaglary döwlet dilinde dilden geçirilýär.

Giriş synaglarynyň tertibinde bellenilen wagtda synaga esassyz sebäplere görä gelip bilmedikler ýa-da dersleriň biri boýunça synagdan geçip bilmedikler ondan soňky synaglara goýberilmeýär.

Giriş synaglarynyň netijeleri boýunça deň mukdarda baha alanlardan talyplyga kabul edilmek üçin artykmaç hukukdan aşakda görkezilenler peýdalanýarlar:

 — saýlan hünäri boýunça 2 ýyldan az bolmadyk iş tejribesi bolanlar;

 — çagyryş boýunça harby gullugy geçenler.

Türkmen döwlet binagärlik-gurluşyk institutynyň salgysy: Aşgabat ş., B.Annanow köçesi, 136, «A» okuw binasy; tel.: 28-18-85, 28-18-16.

Eger-de siz sözlemde harp ýalňyşy gören bolsaňyz, şol sözi saýlap Ctrl+Enter basyň

Teswirler
Teswir ýazmak üçin içeri giriň ýa-da registrasiýa boluň
Meňzeş täzelikler