Şu gün Türkmenistanyň daşary işler ministri Raşid Meredow Ýewropa Bileleşiginiň Türkmenistandaky täze bellenen ilçisi Beata Peksanyň ynanç hatlarynyň nusgalaryny kabul etdi.
Türkmenistanyň DIM-niň resmi saýtynda berilýän habara görä, daşary işler ministri ilçini jogapkärli wezipä bellenilmegi bilen gutlady we Türkmenistandaky diplomatik işini durmuşa geçirmekde üstünlik arzuw etdi.
Habarda bellenilişi ýaly, gepleşikleriň dowamynda taraplar Türkmenistan bilen Ýewropa Bileleşiginiň arasyndaky hyzmatdaşlygy ikitaraplaýyn we «Ýewropa Bileleşigi — Merkezi Aziýa» formatynyň çäklerinde işjeň alnyp barylýandygyny bellediler.
Söwda-ykdysady, ulag-üstaşyr, energetika, bilim ulgamlary, şeýle hem ekologiýa we Merkezi Aziýada suw serişdelerini dolandyrmak meseleleri boýunça pikir alyşmalar geçirildi.
Duşuşykda ýokary derejedäki saparlary alyşmagyň meseleleri hem ara alnyp maslahatlaşyldy.
Şu nukdaýnazardan, taraplar Ýewropa Bileleşiginiň Merkezi Aziýa üçin «BOMKA», «KADAP», «Erazmus+» we ş.m. sebit meýilnamlaryny we taslamalaryny durmuşa geçirmekde Türkmenistanyň we ÝB-niň arasyndaky sazlaşykly işini belläp geçdiler diýlip, habarda bellenilýär.
