Başyny gadymyýetden alyp gelýän Gurban baýramyny agzybirlikde we jebislikde bellemek türkmen halkynyň asylly däplerini biridir. Baýramy bellemegiň däpleri nesilde-nesle geçirilip, biziň günlerimize ýetirilipdir.
Şu gün ir bilen Türkmenistanyň ähli ýerlerinde metjitlerde baýramçylyk namazy okaldy, öten-geçenler ýatlanyldy. Türkmenistanlylar öňden gelýän däbe görä, janly soýup, milli tagamlary taýýarladylar we ýakynlaryna, dostlaryna hem-de tanyşlaryna hödür edýärler.
Ozal habar berşimiz ýaly, Türkmenistanda milli baýram — Gurban baýramy 28-29-30-njy iýun günlerinde belleniler.
Belläp geçsek, Gurban baýramy yslam dünýäsinde iki sany esasy baýramyň biri bolup, ol beýleki bir möhüm baýram — Oraza baýramyndan 70 gün soňra bellenilýär. Döwlet Baştutanynyň ýörite Permany esasynda, şol baýramçylyk günleri Türkmenistanda iş günleri däl diýlip yglan edilýär.
