Girmek
Angliýanyň «Mançester Siti» topary Ýewropa çempionlar ligasynyň final oýnunda Italiýanyň «Inter» klubyndan üstün çykdy. Stambul şäherindäki Olimpiýa stadionynda geçirilen oýun 1:0 hasabynda «şäherlileriň» peýdasyna tamamlandy.
Gapma-garşylygyň ykbalyny çözen ýeke-täk gol 68-nji minutda iňlis toparynyň ýarymgoragçysy Rodri tarapyndan geçirildi. Şeýlelikde, «Mançester Siti» öz taryhynda ilkinji gezek ÝÇL-iň çempiony boldy. Ýaryşda ikinji gezek finalda oýnan bu topar mundan ozal 2021-nji ýylda aýgytlaýjy duşuşykda 1:0 hasabynda «Çelsiden» asgyn gelipdi. Mundan başga-da, «Mançester Sitiniň» öz taryhynda ilkinji gezek trebl edendigini, ýagny APL, ÝÇL we Angliýanyň Kubogy ýaly üç esasy bäsleşigiň ählisinde ýeňiji bolandygyny bellemek gerek. Toparyň halypasy Hosep Gwardiola bolsa taryhda iki gezek trebl eden tälimçi hökmünde rekord goýdy. Ol 2008/09-njy ýyllardaky möwsümde «Barselona» bilen hem üç esasy kubogyň ählisini eýelemegiň hötdesinden gelipdi.
Ýeri gelende bellesek, şu möwsümde italýan klublar ýewrokubok ýaryşlarynyň ählisinde finala çykmagy başardylar. Emma finallaryň hemmesinde hem Italoýanyň wekilleri şowsuzlyga ýüz urdular. Has takygy, «Interden» öň «Roma» Ýewropa ligasynyň finalynda «Sewilýadan», «Fiorentina» bolsa Konferensiýalar ligasynyň finalynda «West Hemden» utulypdy.