«Narwa Trans» final duşuşygynda Talliniň «Florasyny» utup, Estoniýanyň kubogyna mynasyp boldy. Şeýlelikde, topar 2023 ― 2024-nji ýyllaryň futbol möwsüminde Ýewrokuboklara gatnaşmaga hukuk gazandy. Final duşuşygy 2:1 hasabynda tamamlandy.

Ýeňiji toparyň gollaryny 54-nji minutda Aleks Markowiç bilen 81-nji minutda Kim Do Hýon geçirdi. Kuboga mundan ozal 2017-nji we 2022-nji ýyllarda «Transyň» düzüminde mynasyp bolan Nikita Mihaýlow bolsa «Floranyň» ýeke-täk goluny geçirdi.

Bu ýeňiş «Narwa Transa» geljek möwsümde UEFA-nyň Konferensiýalar ligasynyň birinji saýlama tapgyryna gatnaşmak mümkinçiligini berdi.

Ozal hem habar berşimiz ýaly, «Narwa Trans» Türkmenistanyň milli ýygyndysynyň ýarym goragçysy Mirza Beknazarowy 1+1 ýyllyk düzümine goşdy. Şu aýyň başynda ol Ýewropada işlemäge we «Narwa Transyň» düzüminde duşuşyklara gatnaşmaga rugsatnama aldy.

Häzir ýarym goragçy Türkmenistanyň milli ýygynysynyň düzüminde Merkezi Aziýanyň çempionatyna gatnaşmaga taýýarlyk görýär.