Merkezi Aziýa ýurtlarynyň hem-de Hytaý Halk Respublikasynyň gümrük gulluklarynyň ýolbaşçylarynyň sanly ulgam arkaly birinji duşuşygy geçirildi. Bu barada «Watan» habarlar gepleşiginde habar berildi.
Duşuşyga Türkmenistanyň, Hytaý Halk Respublikasynyň, Gazagystan, Gyrgyzystan, Täjigistan we Özbegistan Respublikalarynyň gümrük gulluklarynyň ýolbaşçylary hem-de wekilleri gatnaşdylar.
Duşuşygyň barşynda gümrük işinde bilelikdäki hyzmatdaşlygyň dürli ugurlary ara alnyp maslahatlaşyldy. Olaryň hatarynda ýurtlaryň arasyndaky söwda dolanyşygynda gümrük taýdan resmileşdirmegi ýönekeýleşdirmek, ulaglaryň we harytlaryň üstaşyr geçirilmeginde «Bir penjire» taslamasynyň çäginde hyzmatdaşlyk etmek, «akylly» gümrük babatda tejribe alyşmak, ygtyýarly ykdysady operatorlary özara ykrar etmek, gümrük kadalarynyň bozulmalaryna garşy göreşmek hem-de gümrük maglumatlaryny deslapdan alyşmak meselelerine seredildi.
Duşuşygyň netijesi boýunça Merkezi Aziýa ýurtlarynyň hem-de Hytaýyň gümrük gulluklarynyň ýolbaşçylarynyň duşuşyklarynyň guralynyň işi hakynda Düzgünnamanyň taslamasy deslapdan ylalaşyldy.
