6-njy ýanwarda Türkmenistanyň Prezidenti Serdar Berdimuhamedowyň Hytaý Halk Respublikasyna ilkinji döwlet saparynyň çäklerinde giňeldilen hem-de dar düzümde ýokary derejeli türkmen-hytaý gepleşikleri geçirildi. Bu barada «Türkmenistan» gazetiniň elektron sahypasynda habar berilýär.

Hytaýyň Halk ýygnaklar öýünde belent mertebeli türkmen myhmanyny resmi garşylamak dabarasyndan soňra, wekiliýet agzalarynyň gatnaşmagynda giňişleýin düzümdäki gepleşikler geçirildi. Onuň dowamynda strategik häsiýete eýe bolan türkmen-hytaý gatnaşyklaryny mundan beýläk-de ösdürmek bilen bagly meseleleriň giň toplumy ara alnyp maslahatlaşyldy.

Bellenilişi ýaly, duşuşykda Türkmenistanyň Prezidenti hem-de Hytaý Halk Respublikasynyň Başlygy ikitaraplaýyn hyzmatdaşlygyň häzirki ýagdaýydyr geljekki mümkinçilikleri, özara gyzyklanma bildirilýän sebit we halkara gün tertibiniň möhüm meseleleri babatda garaýyşlaryny beýan etdiler. Prezident Serdar Berdimuhamedow daşary syýasatda Hytaý bilen Türkmenistany garaýyşlaryň, maksatlaryňdyr wezipeleriň ýakynlygynyň birleşdirýändigini belläp, Türkmenistanyň Hytaýyň «Bitewi Hytaý» syýasatyna berk eýerýändigini, ýurduň «Bir guşak, bir ýol» başlangyjy bilen türkmen tarapynyň «Beýik Ýüpek ýoluny gaýtadan dikeltmek» strategiýasynyň özara sazlaşdyrylýandygyny aýratyn nygtady. Hususan-da, Merkezi Aziýa sebitinde parahatçylygy pugtalandyrmak, parlamentara gatnaşyklary işjeňleşdirmek, söwda-ykdysady, ýangyç-energetika, ulag-aragatnaşyk, medeni-ynsanperwer ulgamlarda ýola goýlan hyzmatdaşlygy çuňlaşdyrmak bilen bagly meseleler türkmen-hytaý gepleşikleriniň esasyny düzdi.

Serdar Berdimuhamedowyň we Hytaý Halk Respublikasynyň Başlygy Si Szinpiniň gatnaşmagynda iki ýurduň wekiliýetleriniň dar düzümde geçiren gepleşikleriniň barşynda bolsa dostlukly döwlete şu gezekki saparyň gün tertibine girizilen meseleler, türkmen-hytaý gatnaşyklaryny täze many-mazmun bilen baýlaşdyrmaga ýardam etjek ikitaraplaýyn ylalaşyklary durmuşa geçirmegiň ýollary ara alnyp maslahatlaşyldy.

Gepleşikler tamamlanandan soňra iki ýurduň Liderleriniň gatnaşmagynda ikitaraplaýyn resminamalara gol çekmek dabarasy boldy.