Girmek
Habar berşimiz ýaly, şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Onda şu ýylyň on aýynda alnyp barlan işleriň jemleri jemlenildi. Şeýle-de käbir resminamalaryň taslamalaryna garaldy we ýurdy durmuş-ykdysady taýdan ösdürmek boýunça ileri tutulýan wezipeler ara alnyp maslahatlaşyldy.
Mejlisiň barşynda wise-premýer H.Geldimyradow döwlet Baştutanynyň görkezmelerine laýyklykda, üstünde işlenilen 2023-nji ýyl üçin Döwlet býujetiniň taslamasy barada hasabat berdi. Geljek ýyl üçin esasy maliýe meýilnamasynyň taslamasynyň esasy maddalary boýunça göz öňünde tutulan çykdajylar barada aýdylyp, serişdeleriň ep-esli böleginiň durmuş ulgamyny ösdürmäge gönükdiriljekdigi bellenildi.
Bellenilişi ýaly, 2023-nji ýyl üçin bölünip berilýän maýa goýumlary-da milli ykdysadyýetiň kuwwatyny pugtalandyrmaga, pudaklar üçin täze önümçilikleri gurmaga hem-de hereket edýänlerini döwrebaplaşdyrmaga, ýaşaýyş jaýlaryny gurmaga gönükdiriler.
Prezident Serdar Berdimuhamedow hasabaty diňläp, işiň ileri tutulýan ugurlarynyň birnäçesine ünsi çekdi. Ýurduň ykdysadyýetiniň ýagdaýyna seljerme geçirmek, şeýle hem emele gelen ýagdaýdan ugur alyp, ýurdy durmuş-ykdysady ýtaýdan ösdürmekde garaşylýan netijeleri seljermek ýerine ýetirilmeli işleriň esasylarynyň hatarynda görkezildi.
Şeýle-de býujetiň girdejilerini artdyrmak boýunça-da zerur çäreleriň görülmeginiň möhümdigine üns çekildi. «Maksatnamalary maliýeleşdirmegiň goşmaça çeşmelerini gözlemegi dowam etmek wajypdyr» diýip, döwlet Baştutany belledi.
— Geljek ýylda ýurdumyzy ykdysady taýdan ösdürmegiň maksatnamasyny taýýarlamagy çaltlandyrmak ilkinji nobatdaky wezipeleriň biridir. Gurluşyk maksatnamasyna-da aýratyn üns bermek zerurdyr — diýip, Prezident Serdar Berdimuhamedow aýtdy.
Türkmenistanyň Prezidenti geljek ýylyň Döwlet býujeti barada aýdyp, 2023-nji ýyl üçin ýurduň baş maliýe meýilnamasynyň taslamasynyň Milli Geňeşiň Mejlisine iberilýändigini belledi.
Bellenilişi ýaly, bu resminamada degişli Permana laýyklykda zähmet haklarynyň, pensiýalaryň, talyp haklarynyň, döwlet kömek pullarynyň we beýleki durmuş tölegleriniň möçberlerini mundan beýläk-de ýokarlandyrmak göz öňünde tutulýar. Şunuň bilen baglylykda, döwlet Baştutany Milli Geňeşiň Mejlisine iberilýän hata gol çekdi.
Şeýle-de okaň: